O‘zbekistonda sog‘lom turmush tarzini keng targ‘ib qilish va aholini jismoniy tarbiya va ommaviy sportga jalb etish to‘g‘risidagi Hukumat qarori qabul qilindi. Bu haqda Adliya vazirligining Telegram’dagi “Huquqiy axborot” kanali xabar berdi.
Qarorga muvofiq, 2019-yil 10-fevraldan barcha telekanallarda har kuni uch marta 3—5 daqiqali ommaviy badantarbiya mashg‘ulotlari videoroliklari namoyish etiladi.
Qaror bilan aholining jismoniy tayyorgarligi va salomatligi darajasini belgilovchi “Alpomish” va “Barchinoy” maxsus testlarini qabul qilish va musobaqalarini o‘tkazish tartibi to‘g‘risidagi nizom tasdiqlandi.
Nizomga muvofiq, “Alpomish” testlari erkaklar uchun, “Barchinoy” testlari ayollar uchun qo‘llaniladi.
Maxsus testlar bo‘yicha musobaqalarda 6 yosh va undan katta yoshdagi barcha fuqarolar ishtirok etishi mumkin.
Musobaqalar yugurish, arqonda sakrash, turnikda tortilish, uzunlikka sakrash va boshqa bir qator sport turlari bo‘yicha o‘tkaziladi.
Musobaqa g‘oliblari “Alpomish” va “Barchinoy” ko‘krak nishonlari hamda boshqa qimmatbaho sovg‘alar bilan taqdirlanadi.
Shuningdek, qaror bilan O‘zbekistonda sportning ommaviyligini yanada oshirish maqsadida milliy sport turlari va xalq o‘yinlarini rivojlantirish bo‘yicha chora-tadbirlar dasturi tasdiqlandi.
Dastur doirasida har bir ta’lim muassasasida milliy sport turlari va xalq o‘yinlari bilan shug‘ullanish uchun sport to‘garaklari tashkil etiladi.
Shuningdek, O‘zbekiston milliy sport turlari bo‘yicha kadrlar zaxirasi tayyorlanadi hamda sportchilar, trener va hakamlar tibbiy dispanser nazoratidan o‘tkaziladi va har 6 oyda bir marta tibbiy ko‘rikdan o‘tkaziladi.
“O‘zbekistonning milliy sport turlari va xalq o‘yinlari targ‘ibotchisi” nominatsiyasi ta’sis etiladi.
Sportning o‘yin turlari bo‘yicha “Ayollar sporti” va “Sog‘lom oila” festivallari o‘tkaziladi.
Izoh (0)