17-yanvarning e’tiborga molik yangiliklari — “Daryo” dayjestida.
Toshkent metropolitenida ilk marta sinov tariqasida bepul Wi-Fi ishga tushirildi.
Ayni paytda tajriba-sinov tariqasida Alisher Navoiy va Paxtakor metrostansiyalarida jamoat Wi-Fi qurilmalari ishlamoqda.
Kelgusida bepul Wi-Fi metroning barcha stansiyalarida ishga tushirilishi rejalashtirilgan.
***
Krishtianu Ronaldu va uning rafiqasi saratonga chalingan qirg‘izistonlik qizchani yo‘qladi.
Qirg‘izistonlik Yuna ismli qizaloq suyak saratoni kasalligiga chalingan. U hozirda Italiyaning Turin shifoxonalaridan birida davolanmoqda.
Yunani ko‘rish uchun bir nechta futbolchilar, jumladan, mashhur futbolchi Krishtianu Ronaldu va uning rafiqasi Jorjina Rodriges tashrif buyurdi.
***
O‘zbekiston xalq artisti Po‘lat Saidqosimovning og‘ir ahvolda shifoxonaga tushdi.
Farg‘ona viloyati Qo‘qon shahrida film suratga olish jarayonida ishtirok etayotgan taniqli aktyor, O‘zbekiston xalq artisti Po‘lat Saidqosimovning to‘satdan tobi qochib qoldi. Unga zarur tibbiy yordam ko‘rsatilib, aniq tashxis qo‘yilib, vaqtida Toshkent shahriga Respublika shoshilinch tibbiy yordami ilmiy markaziga olib borildi.
U ko‘rikdan o‘tkazilib, operatsiya qilingan. Jarrohlik amaliyoti murakkab kechgani sababli uning davomiyligi 6 soat davom etgan.
Hozirda 88 yoshli Po‘lat Saidqosimovning ahvoli og‘irligicha qolmoqda. Bemor Toshkent shahri Respublika shoshilinch tibbiy yordami ilmiy markazining jonlantirish bo‘limida yotibdi. Malakali shifokorlar uning hayoti uchun kurashmoqda.
***
Zominda yosh bola yotgan beshik isitish moslamasiga yaqin qo‘yilib, nazoratsiz qoldirildi. Holat ayanchli yakun topdi.
Xonadon sohibasi buni sezib qolib, beshikdagi jarohatlangan o‘g‘lini shifoxonaga olib ketganligi ma’lum bo‘lgan. Lekin ko‘rsatilgan tibbiy yordamga qaramasdan uy egasining farzandi 2018-yilda tug‘ilgan M.D. shifoxonada vafot etgan.
***
O‘zbekiston Respublikasi Prezidenti Shavkat Mirziyoyev Hindiston Respublikasi Bosh vaziri Narendra Modining taklifiga binoan 17-yanvar kuni amaliy tashrif bilan Hindistonning Ahmadobod shahriga keldi.
Ahmadobod xalqaro aeroportida oliy martabali mehmonni Hindiston Respublikasi rasmiy doiralari vakillari kutib oldi.
Davlat rahbari 18-yanvar kuni Gujarat shtati markazi Gandinagar shahrida o‘tadigan “Jo‘shqin Gujarat – 2019” IX xalqaro investitsiya sammitida ishtirok etadi.
Izoh (0)