Mana uch yildirki fan, adabiyot, san’at, sportda va boshqa sohalarda yuksak natijalarga erishgan, xalqaro va milliy nufuzli olimpiadalarda g‘olib bo‘lgan yoshlar o‘zlariga tantanali ravishda topshirilgan uy sertifikatlariga termilib o‘tiribdilar. Sertifikat bor, ammo uy-joydan darak yo‘q. Uch yildan beri tashkilotlar ijtimoiy hayotda faol bo‘lgan yoshlarning qo‘ynini puch yong‘oq bilan to‘ldirib keladi. Bu haqda O‘zA xabarida aytiladi.
Yoshlar ittifoqi, Toshkent shahar hokimligi yoshlarga ommaviy axborot vositalari orqali ko‘z-ko‘z qilgan holda ijtimoiy hayotda faol deb, topilgan yoshlarga kvartiralarning sertifikatlarini topshirgan. Biroq bu ishlar xuddi xo‘jako‘rsinga qilingandek. Nega 630 nafar yoshlar bugun kvartira deb, bir parcha sertifikatni ko‘tarib tashkilotma-tashkilot sarson bo‘lmoqda?
Uch yil davomida yoshlarning to‘plagan bisotlari quruq va’dalar, farmon, qaror kabi hujjatlar bo‘ldi. Toshkent shahar, Sergeli tumani “Chosh-tepa“ MFYda bunyod etilgan uylarga ijtimoiy hayotimizda faol, deb topilgan yoshlarga ajratilgani qog‘ozda ko‘rsatilgan lekin amalda-chi?
Imtiyozli kredit asosida yoshlarga beriladigan uylar haqidagi farmonlar faqat qog‘ozdami? Amalda ularni bajarish kimlar uchun “noqulaylik” tug‘dirmoqda?
Mutasaddilar yana qachongacha yoshlarni sertifikat bilan aldab yurmoqchi? Ularga farmon va qarorlarda nazarda tutilgan uylar qachon beriladi? — deyiladi xabarda.
O‘zA muxbiri uch yildan beri imtiyozli kredit asosida uy kutayotgan 630 nafar yoshlar muammosini o‘rganmoqda.
Izoh (0)