15 январь куни Тошкент шаҳридаги Инҳа университетида Корея ихтирочи аёллар ассоциацияси (КWИА) президенти Юн Мунг Хи билан Ўзбекистон интеллектуал мулк агентлиги бош директори Алишер Файзуллаев, Хотин-қизлар қўмитаси вакиллари ва етакчи экспертлари учрашуви бўлиб ўтди. Бу ҳақда университет матбуот хизмати хабар берди.
Ушбу ташрифдан мақсад Жанубий Корея ва Ўзбекистон ўртасида билим ва тажриба алмашишдир.
Шунингдек, «Ихтирочи аёллар – фан, инновация, инвестиция» мавзусидаги давра суҳбати доирасида Ўзбекистон Ихтирочи аёллар маркази ва Корея ихтирочи аёллар ассоциацияси ўртасида ўзаро англашув меморандуми имзоланди. Ушбу ҳужжат икки томонлама ихтирочилик, таълим, бизнес ҳамда маданий алоқаларни ривожлантиришга, мамлакат олима, тадбиркор ва мутахассис аёллари эришаётган ютуқларини халқаро даражага олиб чиқишга хизмат қилади.
Таъкидлаш жоизки, Тошкент шаҳридаги Инҳа университети халқаро ташкилотлар билан ҳамкорликда ҳар йили хотин-қизларни қўллаб-қувватлаш ҳамда уларни ушбу соҳада ижодий салоҳиятини юзага чиқариш мақсадида АТ соҳасида танловлар ва тадбирлар ўтказиб келмоқда.
Бугунги кунда Ўзбекистон Хотин-қизлар қўмитаси IUT билан биргаликда қўшма лойиҳаларни ташкил қилмоқда, бу хотин-қизларга грант дастурларида иштирок этишга имконият яратади. Қайд этиш лозимки, Корея ихтирочи аёллар ассоциацияси (КWИА) жамиятда обрўсини кўтариш, янгиликлар яратишга хизмат қилади ва уларни патентлашга имкон беради.
Изоҳ (0)