Vatan himoyachilari kuni hamda O‘zbekiston Respublikasi Qurolli Kuchlari tashkil etilganligining 27 yilligi munosabati bilan Mudofaa, Ichki ishlar, Favqulodda vaziyatlar vazirliklari, Davlat xavfsizlik xizmati, Milliy gvardiya Davlat bojxona qo‘mitasi rahbariyati vakillaridan bir guruhi harbiy orkestr sadolari ostida Mustaqillik va ezgulik monumentiga — Baxtiyor ona siymosi poyiga gulchambarlar qo‘ydi. Bu haqda Mudofaa vazirligi matbuot xizmati “Daryo”ga ma’lum qildi.
Shundan so‘ng O‘zbekiston Respublikasi davlat madhiyasi yangradi. Faxriy qorovul vzvodi monument yonidan tantanali marsh sadolari ostida o‘tdi. Vatan himoyachilari Baxtiyor onaga ta’zim bajo keltirishdi.
Shuningdek, Mudofaa vazirligi mas’ul ofitserlari hamda O‘zbekiston Qurolli Kuchlari akademiyasi vakillari harbiy orkestr sadolari ostida general Sobir Rahimovning Olmazor tumanidagi haykali poyiga gulchambarlar qo‘yishib, Vatan himoyachisi ramziga hurmat-ehtirom ko‘rsatdi.
Izoh (0)