Xalq ta’limi vazirligining Telegram kanalida fan olimpiadalarida o‘quvchisi faxriy o‘rinni egallagan o‘qituvchilar qanday tarzda rag‘batlantirilishi haqida ma’lumot berildi.
O‘zbekiston Respublikasi Prezidentining “Yoshlarni ma’naviy-axloqiy va jismoniy barkamol etib tarbiyalash, ularga ta’lim-tarbiya berish tizimini sifat jihatdan yangi bosqichga ko‘tarish chora-tadbirlari to‘g‘risida”gi 2018-yil 14-avgustdagi PQ-3907-son qarorining 7-bandida, ta’lim muassasalarida faoliyat olib borayotgan pedagog xodimlarning mehnatini munosib rag‘batlantirish maqsadida hududiy, respublika va xalqaro fan olimpiadalarida sovrinli o‘rinlarni qo‘lga kiritgan o‘quvchilarni tayyorlagan umumiy o‘rta ta’lim maktablari pedagog kadrlari quyidagi tartibda eng kam oylik ish haqining 5 baravaridan 50 baravarigacha miqdorda bir martalik pul mukofoti bilan taqdirlash tartibi yuzasidan Vazirlar Mahkamasiga taklif kiritish belgilangan.
Ayni kunlarda vazirlik tomonidan tegishli vazirlik va idoralar bilan kelishilgan holda takliflar (Vazirlar Mahkamasi qarori loyihasi) tayyorlanib, ko‘rib chiqish (tasdiqlash) uchun Hukumatga kiritilgan.
Ushbu qaror loyihasi Vazirlar Mahkamasi tomonidan ko‘rib chiqilmoqda. Belgilangan tartibda tasdiqlanganidan so‘ng ommaviy axborot vositalari orqali e’lon qilinadi va barcha ta’lim muassasalariga yetkaziladi.
“Vazirlik barcha pedagoglardan ijtimoiy tarmoqlardagi va ba’zi Telegram kanallaridagi xalq ta’limi tizimiga oid tasdiqlanmagan ma’lumotlarga chalg‘ib qolmasliklarini so‘raydi. Fan olimpiadada o‘quvchisi o‘rin olgan o‘qituvchilarga pul mukofoti berilish tartibi bo‘yicha rasmiy hujjat qabul qilinganidan so‘ng barcha xabardor qilinadi va amaliyotga joriy etiladi”, — deyiladi xabarda.
Izoh (0)