Majburiy ijro byurosining Toshkent shahar boshqarmasi xodimlari tomonidan aniqlanshicha, Yashnobod tuman elektr korxonasi sobiq xodimi A.N., “Toshshahargaz” hududiy filiali xodimi R.K. bilan oldindan til biriktirib, Yashnobod tumani Boysun MFYda yashovchi energiya resurslaridan foydalanuvchi iste’molchilardan mavjud qarzdorliklarini ma’lum miqdordagi naqd pul mablag‘lari evaziga elektr va gaz hisoblagichlari ko‘rsatkichini orqaga aylantirish bilan muntazam shug‘ullanib kelgan. Bu haqda “Daryo”ga Toshkent shahar MIB boshqarmasi xabar qildi.
Holatga ko‘ra, Yashnobod tuman elektr korxonasi sobiq xodimi A.N., “Toshshahargaz” hududiy filiali xodimi R.K.lar Yashnobod tumani Qorako‘l ko‘chasidagi uylardan biriga borib, ushbu xonadondagi gaz hisoblagich ko‘rsatkichida bo‘lgan 800 000 so‘mlik qarzdorlikni yo‘q qilish yo‘li bilan 500 000 so‘m pora evaziga 100 000 so‘mga qalbaki to‘lov kvitansiyasini, joriy yilning 8-dekabr kuni Boysun ko‘chasidagi boshqa bir xonadonga borib, mazkur xonadonning gaz hisoblagichini orqaga aylantirib berish evaziga 350 000 so‘m pullarni qo‘lga kiritgan.
Shundan so‘ng, firibgarlar o‘zining noqonuniy harakatlarini davom ettirib, Xatirchi ko‘chasidagi uylardan biriga borib, ushbu xonadonning ham gaz hisoblagichini orqaga aylantirgan uy egasidan 400 000 so‘m olgan. Bundan tashqari shu kunning o‘zida tumandagi O‘rta yo‘l ko‘chasidagi uylardan birining egasiga gaz hisoblagichi eskirganligi, ishlamayotganligini, tezda yangisiga almashtirilishi kerakligini aytib, uy egasini qo‘rqitgan va yangi hisoblagich o‘rnatish uchun xonadon egasidan 980 000 so‘m olgan, aldangan xonadon egasi ham firibgarlarning navbatdagi qurboniga aylangan.
Shu kunning o‘zida olg‘ir firibgarlar Boysun ko‘chasidagi boshqa bir uyga tashrif buyurib, yana elektr hisoblagichni orqaga aylantirib berish evaziga 200 000 so‘m, Boysun ko‘chasi 7-uyga borib elektr hisoblagichning qopqog‘ini almashtirishgani evaziga 350 000 so‘m, Axsikat ko‘chasi 82-uyga borib, elektr simlarini almashtirib, avtomat qo‘yib berganligi uchun 50 000 so‘m, Axsikat ko‘chasi 124-xonadonning elektr energiyasidan 650 000 so‘mlik qarzdorligini yo‘q qilish yo‘li bilan 100 000 so‘m pora evaziga 100 000 so‘mga qalbaki to‘lov kvitansiyalarini yozib bergan.
11-dekabr kuni esa O‘rta yo‘l ko‘chasi 37-uyga borib, elektr hisoblagichni harakatdan to‘xtatib qo‘yiishganligi va gaz hisoblagich ko‘rsatkichini orqaga aylantirib bergan mehnati evaziga xonadon egasidan 100 dollarini olib, 100 000 so‘mlik to‘lovni qalbaki kvitansiyaga muhrlagan. 700 000 so‘mni o‘zaro bo‘lib olgan.
12-dekabr kuni esa O‘rta yo‘l ko‘chasi 118-xonadon egasidan mavjud qarzdorlikni yo‘q qilish ya’ni gaz hisoblagichini orqaga aylantirish evaziga 300 dollarini qo‘lga kiritgan.
O‘rta yo‘l ko‘chasi 37-xonadondagi gaz hisoblagichning ko‘rsatkichi taxminan 2 000 kubaga bo‘lgan qarzdorlikni yo‘q qilish evaziga 100 dollarini uy egasidan pora sifatida olgan.
Hozirda mazkur holatlar yuzasidan tezkor surishtiruv ishlari olib borilmoqda.
Izoh (0)