Тошкентда газ ва электр ҳисоблагичларни орқага қайтариш билан шуғулланган шахслар қўлга олинди

Мажбурий ижро бюросининг Тошкент шаҳар бошқармаси ходимлари томонидан аниқланшича, Яшнобод туман электр корхонаси собиқ ходими А.Н., «Тошшаҳаргаз» ҳудудий филиали ходими Р.К. билан олдиндан тил бириктириб, Яшнобод тумани Бойсун МФЙда яшовчи энергия ресурсларидан фойдаланувчи истеъмолчилардан мавжуд қарздорликларини маълум миқдордаги нақд пул маблағлари эвазига электр ва газ ҳисоблагичлари кўрсаткичини орқага айлантириш билан мунтазам шуғулланиб келган. Бу ҳақда «Дарё»га Тошкент шаҳар МИБ бошқармаси хабар қилди.

Ҳолатга кўра, Яшнобод туман электр корхонаси собиқ ходими А.Н., «Тошшаҳаргаз» ҳудудий филиали ходими Р.К.лар Яшнобод тумани Қоракўл кўчасидаги уйлардан бирига бориб, ушбу хонадондаги газ ҳисоблагич кўрсаткичида бўлган 800 000 сўмлик қарздорликни йўқ қилиш йўли билан 500 000 сўм пора эвазига 100 000 сўмга қалбаки тўлов квитансиясини, жорий йилнинг 8 декабрь куни Бойсун кўчасидаги бошқа бир хонадонга бориб, мазкур хонадоннинг газ ҳисоблагичини орқага айлантириб бериш эвазига 350 000 сўм пулларни қўлга киритган.

Шундан сўнг, фирибгарлар ўзининг ноқонуний ҳаракатларини давом эттириб, Хатирчи кўчасидаги уйлардан бирига бориб, ушбу хонадоннинг ҳам газ ҳисоблагичини орқага айлантирган уй эгасидан 400 000 сўм олган. Бундан ташқари шу куннинг ўзида тумандаги Ўрта йўл кўчасидаги уйлардан бирининг эгасига газ ҳисоблагичи эскирганлиги, ишламаётганлигини, тезда янгисига алмаштирилиши кераклигини айтиб, уй эгасини қўрқитган ва янги ҳисоблагич ўрнатиш учун хонадон эгасидан 980 000 сўм олган, алданган хонадон эгаси ҳам фирибгарларнинг навбатдаги қурбонига айланган.

Шу куннинг ўзида олғир фирибгарлар Бойсун кўчасидаги бошқа бир уйга ташриф буюриб, яна электр ҳисоблагични орқага айлантириб бериш эвазига 200 000 сўм, Бойсун кўчаси 7-уйга бориб электр ҳисоблагичнинг қопқоғини алмаштиришгани эвазига 350 000 сўм, Ахсикат кўчаси 82-уйга бориб, электр симларини алмаштириб, автомат қўйиб берганлиги учун 50 000 сўм, Ахсикат кўчаси 124-хонадоннинг электр энергиясидан 650 000 сўмлик қарздорлигини йўқ қилиш йўли билан 100 000 сўм пора эвазига 100 000 сўмга қалбаки тўлов квитансияларини ёзиб берган.

11 декабрь куни эса Ўрта йўл кўчаси 37-уйга бориб, электр ҳисоблагични ҳаракатдан тўхтатиб қўйиишганлиги ва газ ҳисоблагич кўрсаткичини орқага айлантириб берган меҳнати эвазига хонадон эгасидан 100 долларини олиб, 100 000 сўмлик тўловни қалбаки квитансияга муҳрлаган. 700 000 сўмни ўзаро бўлиб олган.

12 декабрь куни эса Ўрта йўл кўчаси 118-хонадон эгасидан мавжуд қарздорликни йўқ қилиш яъни газ ҳисоблагичини орқага айлантириш эвазига 300 долларини қўлга киритган.

Ўрта йўл кўчаси 37-хонадондаги газ ҳисоблагичнинг кўрсаткичи тахминан 2 000 кубага бўлган қарздорликни йўқ қилиш эвазига 100 долларини уй эгасидан пора сифатида олган.

Ҳозирда мазкур ҳолатлар юзасидан тезкор суриштирув ишлари олиб борилмоқда.