So‘nggi vaqtlarda bir necha bor Rossiya aeroportlarida O‘zbekistondan olib kelinayotgan meva-cheva hamda o‘simlik mahsulotlari to‘xtatib qolinayotgani haqida xabar berilgan edi. “Rosselxoznadzor”ning Veterinariya va fitosanitariya nazorati xizmati Sputnik’ka buning sabablarini ma’lum qildi.
“Rosselxoznadzor” tomonidan 2012-yilning 16-aprelida O‘zbekistondan kelayotgan yo‘lovchilar bagaji va qo‘l yuklarida karantin ostiga tushuvchi mahsulotlarni olib kelishni taqiqlash haqida qaror qabul qilingan edi. Lekin shunga qaramasdan yo‘lovchilar yuklarida doimiy ravishda Rossiyada taqiqlangan (karantin ostiga tushuvchi) obyektlarni olib kelishda davom etmoqda.
Xususan, 2014-yilda 242 marotaba, 2015-yilda — 184 marotaba, 2016-yilda — 152 marotaba, 2017-yilda — 190 marotaba, 2018-yilning o‘tgan davri mobaynida — 134 marotaba ana shunday faktlar aniqlangan.
Rossiya va xalqaro fitosanitariya normalariga ko‘ra O‘zbekistondan olib kelingan quruq mevalar, olma, zira, no‘xat, mosh va loviya tarkibida quyidagi zararkunanda hasharotlar aniqlangan: Frankliniella occidentalis Perg., Callosobruchus spp., Bemisia tabaci Gen., Grapholitha molesta Busck., Cuscuta spp., Acroptilon repens DC., Ambrosia artemisiifolia.
“Yuqoridagi faktlarni hisobga olgan holda, hozircha, O‘zbekistondan kelayotgan yo‘lovchilar yuklarida meva-chevalar va boshqa o‘simlik mahsulotlarini olib kelish taqiqini bekor qilishning iloji yo‘q”, — deyilgan xabarda.
Eslatib o‘tamiz, xuddi shunday taqiq nafaqat O‘zbekistondan kelayotgan yo‘lovchilarga nisbatan, balki Tojikiston va Ozarbayjondan kelayotgan yo‘lovchilar uchun ham amal qiladi. Ushbu fitosanitariya talablari YeOII Bojxona komissiyasining 18.06.2010-yilda imzolangan 318-sonli “Yevroosiy iqtisodiy ittifoqida o‘simliklar karantini to‘g‘risida”gi qarorida tasdiqlangan.
Izoh (0)