Сўнгги вақтларда бир неча бор Россия аэропортларида Ўзбекистондан олиб келинаётган мева-чева ҳамда ўсимлик маҳсулотлари тўхтатиб қолинаётгани ҳақида хабар берилган эди. «Россельхознадзор»нинг Ветеринария ва фитосанитария назорати хизмати Sputnik’ка бунинг сабабларини маълум қилди.
«Россельхознадзор» томонидан 2012 йилнинг 16 апрелида Ўзбекистондан келаётган йўловчилар багажи ва қўл юкларида карантин остига тушувчи маҳсулотларни олиб келишни тақиқлаш ҳақида қарор қабул қилинган эди. Лекин шунга қарамасдан йўловчилар юкларида доимий равишда Россияда тақиқланган (карантин остига тушувчи) объектларни олиб келишда давом этмоқда.
Хусусан, 2014 йилда 242 маротаба, 2015 йилда — 184 маротаба, 2016 йилда — 152 маротаба, 2017 йилда — 190 маротаба, 2018 йилнинг ўтган даври мобайнида — 134 маротаба ана шундай фактлар аниқланган.
Россия ва халқаро фитосанитария нормаларига кўра Ўзбекистондан олиб келинган қуруқ мевалар, олма, зира, нўхат, мош ва ловия таркибида қуйидаги зараркунанда ҳашаротлар аниқланган: Frankliniella occidentalis Perg., Callosobruchus spp., Bemisia tabaci Gen., Grapholitha molesta Busck., Cuscuta spp., Acroptilon repens DC., Ambrosia artemisiifolia.
«Юқоридаги фактларни ҳисобга олган ҳолда, ҳозирча, Ўзбекистондан келаётган йўловчилар юкларида мева-чевалар ва бошқа ўсимлик маҳсулотларини олиб келиш тақиқини бекор қилишнинг иложи йўқ», — дейилган хабарда.
Эслатиб ўтамиз, худди шундай тақиқ нафақат Ўзбекистондан келаётган йўловчиларга нисбатан, балки Тожикистон ва Озарбайжондан келаётган йўловчилар учун ҳам амал қилади. Ушбу фитосанитария талаблари ЕОИИ Божхона комиссиясининг 18.06.2010 йилда имзоланган 318-сонли «Евроосий иқтисодий иттифоқида ўсимликлар карантини тўғрисида»ги қарорида тасдиқланган.
Изоҳ (0)