Nukus shahridan 420 kilometr uzoqda – bepoyon Ustyurt kengliklari bag‘rida joylashgan “Qoraqalpog‘iston” posyolkasida 43,5 milliard so‘mlik qurilish-rekonstruksiya va obodonlashtirish ishlari amalga oshirildi. Bu haqda O‘zA xabar bermoqda.
Qo‘ng‘irot tumaniga qarashli ushbu aholi punkti “Obod qishloq” dasturi asosida yangi qiyofa kasb etganidan, avvalo, hudud aholisi behad mamnun.
Qoraqalpog‘iston Respublikasidagi 15 tumandan mazkur dasturga kiritilgan 30 qishloqning har birida ushbu posyolkadagi kabi qurilish va obodonlashtirish ishlarini amalga oshirish uchun 215,1 milliard so‘m mablag‘ yo‘naltirilishi belgilangan. Bugungi kunda dastur doirasidagi ishlarning 82 foizdan ortig‘i bajarilgan.
Aniq raqamlar misolida aytadigan bo‘lsak, Qoraqalpog‘istonda 6 ming 848 turar joy binosi, 48 kilometr yo‘lak ta’mirlanib, 1 ming 393 dona tungi chiroqlar o‘rnatildi. Qishloqlar obodligi yo‘llar ravonligida ham ko‘rinadi. Shu maqsadda 109,4 kilometr ichki avtomobil yo‘llari ta’mirlandi, 22 ta bekat yangidan qurildi.
Qishloqlarda 143 kilometr ichimlik suvi, 130 kilometr irrigatsiya va 50 kilometr melioratsiya tarmoqlari yaxshilandi. 368,5 kilometr elektr tarmog‘i tortildi va 177 dona yangi transformator o‘rnatildi. Shuningdek, 141,5 kilometrlik gaz tarmog‘ida yangidan qurish, mukammal ta’mirlash va demontaj ishlari olib borildi. Xonadonlarga 4 ming 600 ga yaqin suyultirilgan gaz balloni yetkazib berildi. Bugungi kunda 63 ijtimoiy obyektda jami 30 milliard 998 million so‘mlik mukammal ta’mirlash ishlari yakunlandi.
– Tuman markazidan 320 kilometr olisda joylashgan posyolkada bunday o‘zgarishlar bo‘ladi, desa, yil boshida ham birov ishonmasdi, – deydi “Qoraqalpog‘iston” posyolka fuqarolar yig‘ini raisi Qutli Koshimbetova. – O‘tgan asrning 70-yillarida qurilgan ko‘p qavatli uylar butunlay ta’mirtalab ahvolga kelib qolgan edi. Yomg‘ir yog‘sa loy ko‘cha, tomidan chakki o‘tadigan uy ko‘z o‘ngimizda paydo bo‘lardi. Ko‘p qavatli uylar yaqinida tartibsiz qurilgan pana-pastqam ob’ektlar ko‘ngilni xira qilardi. Bugun esa hammasi boshqacha – posyolkamiz zamonaviy shaharchaga aylandi.
Posyolkada 25 ta ko‘p qavatli uy, shuningdek, yo‘lak va yo‘llar ta’mirlandi. Ko‘chalarga yoritgichlar o‘rnatildi. Yosh oilalar, kam ta’minlanganlar hamda nogironligi bor fuqarolar uchun 24 arzon uy-joy qurilib, foydalanishga topshirildi. 2 kilometr toza ichimlik suvi tarmog‘i yaxshilandi, 21 ta transformator va 98 ta eski simyog‘och ustuni, 2,2 kilometr gaz tarmog‘i va 16 ta gaz taqsimlash nuqtasi ta’mirlandi. 16,2 kilometr ichki avtomobil yo‘llari ta’mirlanib, 2 ta bekat qurildi.
Dasturning muhim jihati shundaki, nafaqat qishloq obod bo‘ldi, balki u yerda yashayotgan yurtdoshlarimiz doimiy ish o‘rniga ega bo‘ldi. “Qoraqalpog‘iston” posyolka fuqarolar yig‘inida ham tikuv sexi ishga tushirilib, 80 nafar xotin-qiz doimiy daromad manbai bilan ta’minlandi.
O‘tgan asrning 90-yillaridan buyon qarovsiz yotgan klub qayta ta’mirlanib, zamonaviy “Madaniyat saroyi”ga aylantirildi. Bu yerda Qoraqalpog‘iston Respublikasi Madaniyat vazirligi tomonidan ishlab chiqilgan dasturga asosan turli madaniy-ma’rifiy tadbirlar, teatr tomoshalari, uchrashuvlar tashkil etilmoqda.
“Obod qishloq” dasturi ijrosi doirasidagi ishlar izchil davom ettirilmoqda.
Izoh (0)