O‘zbekiston Qurolli Kuchlari davlat muzeyida Mudofaa vazirligi Faxriylar ishlari bo‘yicha Markaziy kengash a’zosi, mohir uchuvchi Aleksandr Xarlamovning 70 yillik yubileyiga bag‘ishlangan ma’naviy-ma’rifiy tadbir bo‘lib o‘tdi. Bu haqda Mudofaa vazirligi matbuot xizmati “Daryo”ga ma’lum qildi.
Bayram munosabati bilan Aleksandr Xarlamovni qutlash uchun Mudofaa vazirligi Faxriylar ishlari bo‘yicha Markaziy kengashi hamda “Veteran” jangchi-faxriylar va nogironlar birlashmasi raislari so‘zga chiqib, tug‘ilgan kun egasini qutlug‘ yosh bilan tabrikladi. Mehmonlar Aleksandr Xarlamovning hayotiy tajribasi, O‘zbekiston Qurolli Kuchlari Harbiy havo kuchlari qo‘shinlarini rivojlantirishga qo‘shgan hissasini alohida qayd etib o‘tdi.
Tadbir davomida Qurolli Kuchlar markaziy ashula va raqs ansamblining xonandalari tomonidan ijro etilgan kuy-qo‘shiqlar esa barcha mehmonlarga birdek manzur bo‘ldi.
Tadbir so‘ngida yig‘ilganlar Qurolli Kuchlar davlat muzeyida Aleksandr Xarlamovga bag‘ishlangan ekspozitsiyaning ochilish marosimida ham ishtirok etdilar.
Aleksand Xarlamov 1948-yili Qozog‘istonning Zelenova tumanida tug‘ilgan. 1966-yilda Sizran oliy harbiy aviatsiya bilim yurtini tamomlagan. 1991—1992-yillar davomida Toshkentdagi aviatsiya boshqarmasi jangovar tayyorgarlik bo‘limi uchuvchisi — katta inspektor sifatida, 2000—2005-yillarda Harbiy havo kuchlari boshqarmasi boshlig‘ining o‘rinbosari, 2009—2011-yillar davomida “Chirchiq aviatsiya ta’mirlash zavodi”da sinovchi-uchuvchi sifatida faoliyat yuritgan. 2015-yildan buyon Havo hujumidan mudofaa va Harbiy havo kuchlari qo‘shinlari Faxriylar ishlari bo‘yicha kengashining raisi hisoblanadi.
Aleksandr Nikolayevich 1999—2000-yillarda aksilterror operatsiyalarida murakkab va mas’uliyatli vazifalarni bajargani uchun “Do‘stlik” hamda “Shon-sharaf” ordenlari bilan taqdirlangan. U O‘zbekiston vertolyot aviatsiyasining muvaffaqiyatli qo‘llanilishida, ko‘plab yosh harbiy uchuvchilarni tayyorlashda ulkan ishlarni amalga oshirgan. Havoda 7400 soatdan ortiq uchgani sabab “Harbiy uchuvchi-snayper” nomini olgan.
Izoh (0)