O‘zbekiston olimpiya terma jamoasi 2019-yil yanvarida Ozarbayjon va Slovakiya bilan o‘ynaydi

O‘zbekiston olimpiya terma jamoasi 2019-yil yanvarida Turkiyada yig‘in o‘tkazadi va mazkur yig‘inda ular Ozarbayjon va Slovakiya termalariga qarshi bahs olib boradi. Bu haqda terma jamoa bosh murabbiyi Ravshan Haydarov Milliy olimpiya qo‘mitasida tashkil etilgan matbuot anjumanida ma’lum qildi.

Biz Olimpiya terma jamoasi uchun 2020-yilgacha katta strategik reja ishlab chiqqanmiz. Ana shu reja asosida bosqichma-bosqich ish olib boryapmiz. Olimpiya terma jamoasi asta sekin shakllanib bormoqda. Yig‘inlar davomida saralab olingan iqtidorli futbolchilarni xalqaro musobaqalarga olib borilib, ularga tajriba to‘plash imkoni berilmoqda. Bundan tashqari O‘FAdagi Ilmiy metodik guruh mutaxassislari bilan birgalikda Olimpiya terma jamoasiga nomzod futbolchilardan muntazam ravishda jismoniy sinovlar olinyapti. Ularning jismoniy holati tekshirilib, kamchiliklari aniqlanib, jismoniy holatni yaxshilash uchun barcha chora-tadbirlar olib borilmoqda.

Dubai Cup musobaqasiga to‘xtaladigan bo‘lsak, ushbu xalqaro musobaqa biz uchun juda foydali bo‘ldi. Yaponiya, BAA, Kuvayt kabi terma jamoalarga qarshi o‘yinlarda o‘z taktik uslublarimizni sinovdan o‘tkazib oldik. Quvonarlisi, ushbu musobaqada g‘alaba qozonib, navbatdagi tayyorgarlik bosqichini yuqori kayfiyatda yakunladik. G‘alabalar doim yoqimli, bu jarayon futbolchilarda g‘oliblik ruhini paydo qiladi.

Yuqorida strategik reja haqida aytib o‘tdim. Strategik rejamizning 1-bosqichi 2019-yilning mart oyiga qadar mo‘ljallangan. Xabaringiz bor, kelasi yilning mart oyida Toshkentda Osiyo chempionati U23 musobaqasi saralashi bo‘lib o‘tadi. Dastlabki rejamiz, ana shu saralashga munosib tayyorgarlik ko‘rish va Osiyo chempionati yo‘llanmasini qo‘lga kiritish. 1-dekabr kuni Superliga nihoyasiga yetadi. Futbolchilar 10-dekabrga qadar dam olishadi. 10-dekabrdan Toshkentda navbatdagi yig‘inni boshlaymiz. Toshkentda o‘tkazishimizning asosiy sababi o‘sha paytda yurtimizda sovuq havo hukmronlik qilayotgan bo‘ladi. Biz mana shunday ob-havo sharoitida ham futbolchilarni sinab, ularni chiniqtirmoqchimiz. Keyin yanvar oyida Turkiyada yig‘in o‘tkazamiz. Turkiyadagi yig‘in davomida Slovakiya va Ozarbayjon terma jamoalari bilan o‘rtoqlik o‘yinlarida maydonga tushamiz. Bundan tashqari, fevral oyida Ispaniyada turnir tashkil etilmoqda. Mazkur turnirda ham qatnashish rejamiz bor. Shu tariqa mart oyidagi Osiyo chempionati saralashiga tayyorgarlik ko‘ramiz.

Ravshan Haydarov, O‘zbekiston olimpiya terma jamoasi bosh murabbiyi