“Samara — Chimkent” yo‘lining Qozog‘istonning Aqto‘be viloyati Xromtau tumanidan o‘tgan 854-kilometrida 24-noyabr, shanba kuni mahalliy vaqt bilan tong soat 9:00 atrofida Neoplan avtobusi buzilib qolgan. Yordam so‘rab, Qozog‘iston shoshilinch xizmatlariga murojaat qilingan.
Voqea joyiga Aqto‘be viloyati Favqulodda vaziyatlar departmentining ikki xodimi bitta maxsus texnikada yetib kelib, sakkiz kishini qutqargan (avtobusda faqat sakkiz kishi bo‘lganmi yoki maxsus texnikaga sakkiz kishidan ortig‘i sig‘maganmi — bunisi noma’lum). “Zakon.kz”ning yozishicha, ularning yetti nafari — o‘zbekistonlik, qolgan bittasi — qozog‘istonlik.
“Ularning bari Xromtau tumanidagi ‘Omonat’ kafesiga yetkazilgan”, — deyiladi xabarda. Avtobusi qahraton dashtning o‘rtasida buzilib qolgan bu o‘zbekistonliklarning keyingi taqdiri hozircha noma’lum.
22-noyabr kuni Qozog‘istonning Qizilo‘rda viloyati bo‘ylab o‘zbekistonlik 30 dan ortiq yo‘lovchini olib ketayotgan avtobus sirpanchiq yo‘lda ag‘darilib ketgani haqida xabar berilgan edi. Voqea oqibatida kamida bir o‘zbekistonlik halok bo‘lgan.
Izoh (0)