«Самара — Чимкент» йўлининг Қозоғистоннинг Ақтўбе вилояти Хромтау туманидан ўтган 854-километрида 24 ноябрь, шанба куни маҳаллий вақт билан тонг соат 9:00 атрофида Neoplan автобуси бузилиб қолган. Ёрдам сўраб, Қозоғистон шошилинч хизматларига мурожаат қилинган.
Воқеа жойига Ақтўбе вилояти Фавқулодда вазиятлар департментининг икки ходими битта махсус техникада етиб келиб, саккиз кишини қутқарган (автобусда фақат саккиз киши бўлганми ёки махсус техникага саккиз кишидан ортиғи сиғмаганми — буниси номаълум). «Zakon.kz»нинг ёзишича, уларнинг етти нафари — ўзбекистонлик, қолган биттаси — қозоғистонлик.
«Уларнинг бари Хромтау туманидаги ‘Омонат’ кафесига етказилган», — дейилади хабарда. Автобуси қаҳратон даштнинг ўртасида бузилиб қолган бу ўзбекистонликларнинг кейинги тақдири ҳозирча номаълум.
22 ноябрь куни Қозоғистоннинг Қизилўрда вилояти бўйлаб ўзбекистонлик 30 дан ортиқ йўловчини олиб кетаётган автобус сирпанчиқ йўлда ағдарилиб кетгани ҳақида хабар берилган эди. Воқеа оқибатида камида бир ўзбекистонлик ҳалок бўлган.
Изоҳ (0)