O‘zbekiston saytlari reytingini ko‘rsatib boruvchi yangi sayt — “Metrika.uz” ishga tushdi. Bu haqda loyiha rahbari Bobur Nurmuhamedov Spot nashriga ma’lum qildi.
Marketolog sifatida ish olib borgan Nurmuhamedov onlayndagi reklama maydonchalariga doir axborot yetishmovchiligi muammosi bilan muntazam to‘qnash kelgan. U har safar axborot so‘rab resursning o‘ziga murojaat qilishga va axborot tayyor bo‘lishini kutishga majbur bo‘lgan.
Boshqalar ham shunday muammoga duch kelayotgan bo‘lsa kerak, degan taxmin bilan zarur ma’lumotlarni taqdim etuvchi resursni yaratishga qaror qilgan. Ko‘pdan beri mavjud www.uz reytingi esa ma’lumotlarni har doim ham aniq ko‘rsatmaydi.
“Loyiha ustida ikki kishi ish olib bordi. Hammasi Google Analytics’ga ulangan ma’lumotlar asosida ishlaydi, hamkorlarimiz statistik ma’lumotlarni olish uchun imkoniyat bergan. Biz bu ma’lumotlarni shakllantirishda yoki ularni qayta ishlashda umuman ishtirok etmaymiz”, — dedi Nurmuhamedov.
Uning qayd etishicha, reytingga O‘zbekistonning boshqa saytlarini qo‘shish, bozorga Uznet bo‘yicha trendlar, saytlar bo‘yicha statistik ma’lumotlarni taqdim etib borish rejalari bor. Saytlardan tashqari Telegram kanallar va botlar bilan, shuningdek, mobil dasturlar bilan ham ishlash ko‘zda tutilgan.
Izoh (0)