Bir muddat avval Samarqand viloyatining Pastdarg‘om tumani markaziga yaqin joylashgan Kichik Nayman mahallasidagi fuqarolarning hovlisidagi qo‘ylar bo‘g‘izlangan holda topilgani va bu qanday yirtqich tomonidan amalga oshirilgani noma’lumligicha qolayotgani, aholi esa qo‘rquvda yashayotgani haqida xabar berilgan edi.
Bundan tashqari, tuman tibbiyot birlashmasi daydi itlar makoniga aylanib qolgani, bu itlar yozni tuman bozorida o‘tkazgani, biroq mas’ul tashkilotlar bu holatlarga befarq qarayotgani haqida ham xabarlar berilgan edi. “Xabar.uz”ning yozishicha, ushbu holat yuzasidan Pastdarg‘am tumani hokimi B.Sa’dullayev oxir-oqibat munosabat bildirgan.
Pastdarg‘om tuman hokimligi tomonidan “Xabar.uz” portalida e’lon qilingan tuman tibbiyot birlashmasi hududida daydi itlarni ko‘payganligi va tumandagi Kichik Naymancha mahalla fuqarolar yig‘ini hududida noma’lum yirtqich fuqarolarning qo‘ylariga ziyon yetkazayotganligi to‘g‘risidagi ma’lumotlar o‘rganib chiqildi.So‘nggi, ammo rasman tasdiqlanmagan ma’lumotlarga ko‘ra, Pastdarg‘omdagi noma’lum yirtqich chorva mollariga, hatto, bir ayolga ham hamla qilgan. “Mahalliy aholi orasidagi qo‘rquv hali arigani yo‘q”, — deyiladi “Xabar.uz” xabarida.Haqiqatdan ham tuman tibbiyot birlashmasi hududida oxirgi vaqtlarda egasiz yurgan itlar ko‘payganligi, tibbiyot birlashmasi ma’muriyati bunday holatni oldini olish borasida biron bir chora ko‘rmaganligi va mazkur yo‘nalishda tuman obodonlashtirish boshqarmasi maxsus xizmati tomonidan ham biron bir tegishli choralar ko‘rilmayotganligi aniqlandi.
Shuningdek, tumandagi Kichik Naymancha mahalla fuqarolar yig‘ini hududida tunda fuqarolarga tegishli bo‘lgan qo‘ylarni noma’lum hayvon tomonidan bo‘g‘izlab ketish holatlari sodir bo‘lib, buni yovvoyi hayvon bo‘lgan shoqol qilgan bo‘lishi mutaxassislar va mahalliy aholi tomonidan bildirildi.
Yuqoridagi ma’lumotlarni o‘rganish jarayonida o‘z vazifasiga sovuqqonlik bilan qaraganligi uchun tuman obodonlashtirish boshqarmasi it ovchisi A.Jo‘rayev hamda mazkur va boshqa kamchiliklarga yo‘l qo‘ygan tuman tibbiyot birlashmasi bosh vrachi I.Bobobekov o‘z vazifasidan ozod qilingan.
Tuman obodonlashtirish boshqarmasining maxsus xizmat ovchisi tomonidan tibbiyot birlashmasi hududida mavjud bo‘lgan daydi egasiz itlar yo‘q qilindi va tumanning boshqa hududlarida ham ularni yo‘q qilish choralari ko‘rilmoqda.
Yovvoyi yirtqich hayvonlar bilan kurashishni kuchaytirish maqsadida tuman Davlat sanitariya epidemiologiya nazorati markaziga o‘n to‘qqiz million so‘m, tuman veterinariya bo‘limiga o‘n million so‘m dori vositalarini olish uchun tuman hokimligi tomonidan mablag‘ ajratib berildi.
Bundan tashqari tuman hududida egasiz yashaydigan daydi va yirtqich hayvonlar bilan kurashishni kuchaytirish to‘g‘risida mutasaddi tashkilot rahbarlariga topshiriqlar berildi.
B.Sa’dullayev, Pastdarg‘om tumani hokimi
Izoh (0)