Бир муддат аввал Самарқанд вилоятининг Пастдарғом тумани марказига яқин жойлашган Кичик Найман маҳалласидаги фуқароларнинг ҳовлисидаги қўйлар бўғизланган ҳолда топилгани ва бу қандай йиртқич томонидан амалга оширилгани номаълумлигича қолаётгани, аҳоли эса қўрқувда яшаётгани ҳақида хабар берилган эди.
Бундан ташқари, туман тиббиёт бирлашмаси дайди итлар маконига айланиб қолгани, бу итлар ёзни туман бозорида ўтказгани, бироқ масъул ташкилотлар бу ҳолатларга бефарқ қараётгани ҳақида ҳам хабарлар берилган эди. «Xabar.uz»нинг ёзишича, ушбу ҳолат юзасидан Пастдарғам тумани ҳокими Б.Саъдуллаев охир-оқибат муносабат билдирган.
Пастдарғом туман ҳокимлиги томонидан «Xabar.uz» порталида эълон қилинган туман тиббиёт бирлашмаси ҳудудида дайди итларни кўпайганлиги ва тумандаги Кичик Найманча маҳалла фуқаролар йиғини ҳудудида номаълум йиртқич фуқароларнинг қўйларига зиён етказаётганлиги тўғрисидаги маълумотлар ўрганиб чиқилди.Сўнгги, аммо расман тасдиқланмаган маълумотларга кўра, Пастдарғомдаги номаълум йиртқич чорва молларига, ҳатто, бир аёлга ҳам ҳамла қилган. «Маҳаллий аҳоли орасидаги қўрқув ҳали аригани йўқ», — дейилади «Xabar.uz» хабарида.Ҳақиқатдан ҳам туман тиббиёт бирлашмаси ҳудудида охирги вақтларда эгасиз юрган итлар кўпайганлиги, тиббиёт бирлашмаси маъмурияти бундай ҳолатни олдини олиш борасида бирон бир чора кўрмаганлиги ва мазкур йўналишда туман ободонлаштириш бошқармаси махсус хизмати томонидан ҳам бирон бир тегишли чоралар кўрилмаётганлиги аниқланди.
Шунингдек, тумандаги Кичик Найманча маҳалла фуқаролар йиғини ҳудудида тунда фуқароларга тегишли бўлган қўйларни номаълум ҳайвон томонидан бўғизлаб кетиш ҳолатлари содир бўлиб, буни ёввойи ҳайвон бўлган шоқол қилган бўлиши мутахассислар ва маҳаллий аҳоли томонидан билдирилди.
Юқоридаги маълумотларни ўрганиш жараёнида ўз вазифасига совуққонлик билан қараганлиги учун туман ободонлаштириш бошқармаси ит овчиси А.Жўраев ҳамда мазкур ва бошқа камчиликларга йўл қўйган туман тиббиёт бирлашмаси бош врачи I.Бобобеков ўз вазифасидан озод қилинган.
Туман ободонлаштириш бошқармасининг махсус хизмат овчиси томонидан тиббиёт бирлашмаси ҳудудида мавжуд бўлган дайди эгасиз итлар йўқ қилинди ва туманнинг бошқа ҳудудларида ҳам уларни йўқ қилиш чоралари кўрилмоқда.
Ёввойи йиртқич ҳайвонлар билан курашишни кучайтириш мақсадида туман Давлат санитария эпидемиология назорати марказига ўн тўққиз миллион сўм, туман ветеринария бўлимига ўн миллион сўм дори воситаларини олиш учун туман ҳокимлиги томонидан маблағ ажратиб берилди.
Бундан ташқари туман ҳудудида эгасиз яшайдиган дайди ва йиртқич ҳайвонлар билан курашишни кучайтириш тўғрисида мутасадди ташкилот раҳбарларига топшириқлар берилди.
Б.Саъдуллаев, Пастдарғом тумани ҳокими
Изоҳ (0)