O‘zAda jurnalist Anvar Suyunovning “Muallim nodon bo‘lsa yoxud Bulung‘ur tuman Xalq ta’limi bo‘limi mudiri savodsizlarcha imzolagan hujjatlar haqida” sarlavhali maqolasi e’lon qilindi. Maqolada Samarqand viloyati Bulung‘ur tumani Xalq ta’limi mudiri tomonidan imzolangan hujjat xatolarga to‘la ekanligi bayon qilingan. Ushbu hujjat nusxasi surati Facebook ijtimoiy tarmog‘ida ham qizg‘in muhokamalarga sabab bo‘lgan edi. Quyida maqola to‘liqligicha e’tiboringizga havola etiladi.
Shu yilning 3-oktabr kuni ijtimoiy tarmoqlarda “Savod beruvchining savodsizligi...” nomli sarlavha ostida Bulung‘ur tuman Xalq ta’limi bo‘limi mudiri A.Umirzoqov imzolagan (va muhr bosgan) g‘ij-g‘ij xatolardan iborat hujjatlarga ko‘zim tushgan edi.
Tabiiyki, bir qarashda e’tibor bermagan, hujjat matniga sinchiklab ko‘z yugurtirmagan edim. Bugun yana tarmoq “oralagan” ayrim hujjatlarni ko‘rib, ochig‘i bir-ikki og‘iz mulohaza yuritishni lozim deb o‘yladim. Negaki, ta’lim va tibbiyotdagi xato ko‘plab insonlarga yoki kelgusi avlodga jiddiy salbiy ta’sir ko‘rsatishi mumkin. Ushbu hujjatlardagi qusurlarni arzimas imloviy nuqson yoki stilistik g‘aliz jumlalar desa ham bo‘ladi. Ammo, uni Xalq ta’limi bo‘limi mudiri, ya’niki xalqqa ta’lim beradigan, o‘rnak bo‘ladigan tashkilot rahbari tayyorlaganligi hafsalamni pir qildi. Va aytishim mumkinki, bu kabi savodsizlarcha yozilgan yuridik bitikning muallifida savod qay darajada?! U maktabda o‘tiladigan imlo qoidalari yoki grammatik tushunchalardan xabardormi?! – deb o‘ylab qoldim.
Deylik, mamlakatimiz mustaqilligi bilan bog‘liq tadbirlarni yuqori saviyada o‘tkazish bo‘yicha hamda Birinchi Prezidentimiz xotirasiga bag‘ishlangan tadbirlar ijrosi borasidagi buyruqlarida quyidagicha xatolarni sanadim.
“Barcha ta’lim massasalari raxbarlariga” degan jumlada “Ta’lim massasalari” emas, “muassasalari” bo‘ladi. “Raxbarlari” emas “rahbarlari” bo‘ladi.
Bir joyda tashkilot nomi “Xalq ta’limi bo‘limi” deb boshqasida boshqacha nom bilan yozilgan.
1-sentabrdagi bayram oldi tadbirlariga tayyorgarlik ko‘rish bo‘yicha buyruq o‘n uch kun o‘tib, 13-sentabrda chiqyapti. Islom Karimov xotirasini yod etish bilan bog‘liq tadbir buyrug‘i olti kun o‘tib, 16 sentyabrda chiqyapti.
144-son buyruqning 2-bandidagi “463 Q-sonli qarori rahbarlik va ijro uchun qabul qilinsin” degan jumlada “rahbarlik” degan so‘z qanday ma’no anglatishi o‘zbek tili stilistikasiga mos kelmaydi. Jumla g‘oyatda g‘aliz.
Viloyat hokimining qarori nomini ko‘chirishda “uni” so‘zini “uin”shaklida qog‘ozga tushirishgan...
Xullas, Bulung‘ur tuman Xalq ta’limi bo‘limi mudiri A.Umirzoqov imzolagan hujjatlarda bu kabi nuqsonlar bisyor. Agar u qizil qalam bilan to‘g‘rilab chiqilsa, misli lolazor bo‘ladi.
Ishonmasangiz, o‘zingiz guvohi bo‘ling. Ijtimoiy tarmoqdagi shunday hujjatlardan bir nechtasini ilova qilamiz.
Darvoqe, ta’lim tizimidagi bunday holatlarga, shuningdek, quyi bo‘g‘indagi bu kabi rahbarlar ishiga Xalq ta’limi vaziri Sherzod Shermatov e’tibor qaratsa, nur ustiga nur bo‘lar edi.
Izoh (0)