Britaniya transport politsiyasi London metropolitenidagi huquqbuzar Yevrotonnelning sobiq rahbari, 91 yoshli ser Robert Malpasni platformadan metro relslariga itarib yuborayotgani aks etgan videokuzatuv kamerasi yozuvlarini e’lon qildi.
“RIA Novosti”ning yozishicha, kadrlarda 46 yoshli Pol Krossli platformada Malpasning oldiga yugurib kelib, so‘ng uni temiryo‘l izlari tomon itarib yuborganini ko‘rish mumkin.
Xabar berishlaricha, qariyani voqea guvohlaridan biri qutqarib qolgan — u platformadan sakrab tushib, poyezd bekatga kirib kelishiga bir daqiqa qolganida Malpasni qutqarib olib chiqqan.
Hodisa oqibatida Robert Malpasning tos suyagi singan, boshidan qattiq jarohat olgan.
“Nohaqligimni bilaman. Shunchaki o‘tgan oqshom yaxshi uxlamagandim”, — deb politsiyaga ko‘rsatma bergan Pol Krossli; ma’lum bo‘lishicha, unga 17 yoshida paranoyali shizofreniya tashxisi qo‘yilgan.
Sud uni ikki kishini o‘ldirishga qasd qilishda aybdor deb topgan. Xabar berishlaricha, u 2018-yil aprel oyida bir boshqa yigitni metro yo‘liga yiqitib yuborishga uringan.
Izoh (0)