Ayni vaqtda ko‘pchilik fuqarolarning mobil telefonlariga “ommaviy bepul Wi-Fi hududlarini tashkil eting va soliq to‘lovlaridan ozod bo‘ling” degan ma’noda xabarlar keldi. O‘zA bu boradagi yangilikdan ko‘zlangan maqsad va beriladigan imtiyozlar haqida bilish uchun Turizmni rivojlantirish davlat qo‘mitasiga murojaat qildi.
“Prezidentimizning ana shunday hududlar tashkil etishga tegishli farmoni joriy yilning 3-fevralida chiqqan edi, jarayonni tezlashtirish va tadbirkorlarni tashabbusga chorlash uchun bunday SMS’lar yuborildi, — deydi boshqarma boshlig‘i O‘tkir Xolbadalov. — Imtiyozlarga keladigan bo‘lsak, ular bir nechta. Misol uchun, xo‘jalik yurituvchi subyektlar o‘z hududida Wi-Fi o‘rnatsa, shu hududni tashkil etish uchun sarflagan xarajati soliqqa tortiladigan daromaddan chegirib qolinadi”.
Misol uchun, tadbirkor bir oyda 40 million daromad ko‘rsa, shundan 10 millioni modem, kabel va internet trafik sotib olishga sarflandi. Shunda u o‘zi jamg‘argan 30 million daromad uchun soliq to‘laydi.
Yana bir imtiyoz: Tadbirkor o‘zi tashkil etgan jamoatchilik joylari va obyektlarida 18 metr kvadratdan katta bo‘lmagan hajmdagi tashqi reklama bannerini bepul o‘rnatish huquqiga ham ega bo‘ladi. Bu bir tomondan reklama beruvchilarga qulaylik tug‘dirsa, ikkinchi tomondan reklama o‘rnatish uchun shahar hokimiyatidan ruxsat olish va katta miqdorda pul to‘lash talab etilishini inobatga olishi lozim.
Bu choralardan ko‘zlangan maqsad, O‘zbekistonga kelayotgan sayyohlar oqimini yanada ko‘paytirish va ularning internet borasidagi shikoyatlarini kamaytirish. Vaholanki, xorijlik mehmonlarning ko‘pchiligi Wi-Fi hududlarning yo‘qligidan norozi bo‘lmoqda.
Shunday ekan, bunday hududlarni tashkil etgan mehmonxona yoki kafe egasi o‘ziga mijozlarni ko‘paytirish bilan birga daromadini ham oshirish imkoniyatini qo‘lga kiritadi.
Izoh (0)