Айни вақтда кўпчилик фуқароларнинг мобил телефонларига «оммавий бепул Wi-Fi ҳудудларини ташкил этинг ва солиқ тўловларидан озод бўлинг» деган маънода хабарлар келди. ЎзА бу борадаги янгиликдан кўзланган мақсад ва бериладиган имтиёзлар ҳақида билиш учун Туризмни ривожлантириш давлат қўмитасига мурожаат қилди.
«Президентимизнинг ана шундай ҳудудлар ташкил этишга тегишли фармони жорий йилнинг 3 февралида чиққан эди, жараённи тезлаштириш ва тадбиркорларни ташаббусга чорлаш учун бундай SMS’лар юборилди, — дейди бошқарма бошлиғи Ўткир Холбадалов. — Имтиёзларга келадиган бўлсак, улар бир нечта. Мисол учун, хўжалик юритувчи субъектлар ўз ҳудудида Wi-Fi ўрнаца, шу ҳудудни ташкил этиш учун сарфлаган харажати солиққа тортиладиган даромаддан чегириб қолинади».
Мисол учун, тадбиркор бир ойда 40 миллион даромад кўрса, шундан 10 миллиони модем, кабел ва интернет трафик сотиб олишга сарфланди. Шунда у ўзи жамғарган 30 миллион даромад учун солиқ тўлайди.
Яна бир имтиёз: Тадбиркор ўзи ташкил этган жамоатчилик жойлари ва объектларида 18 метр квадратдан катта бўлмаган ҳажмдаги ташқи реклама баннерини бепул ўрнатиш ҳуқуқига ҳам эга бўлади. Бу бир томондан реклама берувчиларга қулайлик туғдирса, иккинчи томондан реклама ўрнатиш учун шаҳар ҳокимиятидан рухсат олиш ва катта миқдорда пул тўлаш талаб этилишини инобатга олиши лозим.
Бу чоралардан кўзланган мақсад, Ўзбекистонга келаётган сайёҳлар оқимини янада кўпайтириш ва уларнинг интернет борасидаги шикоятларини камайтириш. Ваҳоланки, хорижлик меҳмонларнинг кўпчилиги Wi-Fi ҳудудларнинг йўқлигидан норози бўлмоқда.
Шундай экан, бундай ҳудудларни ташкил этган меҳмонхона ёки кафе эгаси ўзига мижозларни кўпайтириш билан бирга даромадини ҳам ошириш имкониятини қўлга киритади.
Изоҳ (0)