CNN: Rossiyaning Il-20 samolyoti Suriya rejimi kuchlari tomonidan urib tushirildi

Rossiyaning Il-20 samolyoti Suriyada Bashar Asad rejimi kuchlari tomonidan Isroil harbiy-havo kuchlariga hujum chog‘ida xatolik tufayli urib tushirildi, deb yozadi “Dojd”. Bu haqda CNN vaziyatdan xabardor amerikalik mansabdorlarga tayanib xabar bergan.

Isroil Latakiya viloyatida qirg‘oq bo‘yidagi nishonlarga bir nechta raketa zarbalarini bergan. Isroilliklarga javob zarbasini bermoqchi bo‘lib, Asadning kuchlari o‘t ochgan va bexosdan Rossiya samolyotini urgan.

AQSh urib tushirilgan samolyot haqida xalqaro chastotalardagi xabardan ma’lumot olgan, unda Suriya armiyasi qidiruv-qutqaruv operatsiyasi boshlangani haqida ma’lum qilgan. “So‘ng AQSh samolyot turi va voqea yuz bergan vaziyat haqida boshqa mamlakatdan to‘g‘ridan-to‘g‘ri xabar oldi”, — deyiladi CNN xabarida. Urib tushirilgan samolyot haqida axborot uzatgan mamlakat nomini telekanal manbalari oshkor etmadi.

Pentagon rasmiy vakili ma’lum qilishicha, AQSh ushbu operatsiyada qatnashmagan, Il-20 esa Rossiyaning o‘zi Damashqqa sotgan qurilmadan urib tushirishgan.

Avvalroq Rossiya mudofaa vazirligi Suriyada bortida 14 nafar harbiy bo‘lgan Il-20 samolyoti g‘oyib bo‘lgani haqida ma’lum qilgan edi.