Россиянинг Ил-20 самолёти Сурияда Башар Асад режими кучлари томонидан Исроил ҳарбий-ҳаво кучларига ҳужум чоғида хатолик туфайли уриб туширилди, деб ёзади «Дождь». Бу ҳақда CNN вазиятдан хабардор америкалик мансабдорларга таяниб хабар берган.
Исроил Латакия вилоятида қирғоқ бўйидаги нишонларга бир нечта ракета зарбаларини берган. Исроилликларга жавоб зарбасини бермоқчи бўлиб, Асаднинг кучлари ўт очган ва бехосдан Россия самолётини урган.
АҚШ уриб туширилган самолёт ҳақида халқаро частоталардаги хабардан маълумот олган, унда Сурия армияси қидирув-қутқарув операцияси бошлангани ҳақида маълум қилган. «Сўнг АҚШ самолёт тури ва воқеа юз берган вазият ҳақида бошқа мамлакатдан тўғридан-тўғри хабар олди», — дейилади CNN хабарида. Уриб туширилган самолёт ҳақида ахборот узатган мамлакат номини телеканал манбалари ошкор этмади.
Пентагон расмий вакили маълум қилишича, АҚШ ушбу операцияда қатнашмаган, Ил-20 эса Россиянинг ўзи Дамашққа сотган қурилмадан уриб туширишган.
Аввалроқ Россия мудофаа вазирлиги Сурияда бортида 14 нафар ҳарбий бўлган Ил-20 самолёти ғойиб бўлгани ҳақида маълум қилган эди.
Изоҳ (0)