Фарғонада профессионал бокс бўйича Ўзбекистон чемпионатининг финал баҳслари ўтказилди. Бу ҳақда «Дарё» мухбири Азизжон Эрматов хабар берди.
Финал жангларида чемпионатнинг вилоят ва минтақавий босқичларида ғолиб бўлган чарм қўлқоп усталари 5 вазн тоифасида куч синашди.
53 кг вазн тоифасида боксчи Олим Назаров навоийлик Нуржан Сериковни мағлуб этиб, чемпионлик камарини қўлга киритди. 63 кг вазн тоифасидаги спортчилар баҳсида хоразмлик Абдурасул Исмоилов Навоий вилояти вакили Улуғбек Дўстмуродовни 3-раундда техник нокаутга учратди. 66 кг вазн тоифасида Тошкент шаҳри вакили Муҳаммадсалим Сотиболдиев, 69 кг вазн тоифасида фарғоналик Акмалхон Жамолхонов мамлакат чемпиони бўлди.
76 кг вазн тоифасидаги финал жангида тезкор нокаут қайд этилди. Фарғона вилояти шарафини ҳимоя қилган Муслимбек Олимов хоразмлик Ражапбой Отаназаровни биринчи раунднинг 30-сониясида нокаутга учратди.
6 раунддан иборат финал жангларида ғолиб бўлган боксчиларга 8 миллион, иккинчи ўрин соҳибларига 4 миллион, учинчи ўринни қўлга киритган спортчиларга эса 2 миллион сўмдан пул мукофотлари топширилди.
Қолган 5 вазн тоифасида финал жанглари 15-сентябр куни Самарқанд вилоятида ўтказилади.
Изоҳ (0)