FIFA kunlari doirasda bugun, 11-sentabr sanasida futbol bo‘yicha O‘zbekiston milliy terma jamoasi Eron termasiga qarshi maydonga tushadi. “Championat.asia” nashri eronliklar ustozi Karlush Keyrush bilan intervyuni taqdim etdi.
— Jahon chempionatidan so‘ng hayotingizda nima o‘zgardi?— Katta o‘zgarish bo‘lgani yo‘q. Men har doim yaxshi murabbiy bo‘lishni xohlaganman. Jahon chempionatidan oldinmi yo keyinmi buning farqi yo‘q. Men oxirgi yillarda faqat eng yaxshi murabbiy bo‘lishga harakat qilyapman.
— Eron garchi Jahon chempionatida guruhdan chiqa olmagan bo‘lsa-da, musobaqada yaxshi ishtirok etdi. Muvaffaqiyatning asosiy siri nimada?
— Oddiy qilib aytganda, qattiq mehnat va to‘g‘ri ishlashda. Biz vaqtdan unumli foydalandik va deyarli har kuni dam olishsiz mashg‘ulot o‘tkazdik.
— Jahon chempionatidan oldin qanday xayolda edingiz?
— Ko‘pchilik bizga ishonmagandi. Chunki mundial paytida odamlarning xayoli boshqa jamoalarda bo‘ladi. Lekin biz ishlashda davom etdik. Kishini xursand qilgan jihati, Jahon chempionati biz uchun muvaffaqiyatli kechdi va endi bemalol Osiyo Kubogi haqida o‘ylasak bo‘ladi.
— JChdan oldin natija qanday bo‘lishidan qat’i nazar Eronni tark etaman degandingiz.
— Yo‘q, men bunday demaganman. Balki jurnalistlarning o‘zi to‘qib yozgan bo‘lishlari mumkin.
— Osiyo Kubogi-2019 da g‘olib chiqish asosiy maqsadingizmi?
— Ha. Biz bu musobaqaga faqat g‘alaba uchun boramiz. Eron oldida bundan boshqa yo‘l yo‘q.
— Qishda O‘zbekiston futbol assotsiatsiyasi rahbariyati bilan uchrashganmisiz?
— Bu savolni izohsiz qoldiraman.
— O‘zbekiston terma jamoasini boshqarish bo‘yicha rasmiy taklif bo‘lganmi?
— Matbuot anjumanida aytib o‘tganimdek, bu kabi savollarni ochiq qoldiraman.
— Mayli, boshqa savolga o‘tamiz. Shu paytgacha O‘zbekistonga qarshi oltita o‘yin o‘tkazgansiz. Shundan to‘rttasi rasmiy va ikkita o‘rtoqlik. Qaysi uchrashuv ko‘proq yodingizda qolgan?
— Menda O‘zbekiston bilan har doim iliq xotiralar qolgan. Lekin eng katta darsni 2012-yil Tehronda bo‘lib o‘tgan o‘yindan olganman. O‘shanda biz 0:1 hisobida yutqazib qo‘ygandik.
— Qaysi g‘alabani ko‘proq eslab turasiz?
— Barchasini. Chunki g‘alaba kishiga zavq bag‘ishlaydi, muxlislar ham xursand bo‘ladi.
— Eronning navbatdagi raqibi O‘zbekiston terma jamoasi deyilganda xayolingizga nimalar keladi?
— Men xoh O‘zbekiston, xoh boshqa jamoa bo‘lsin raqib deganda faqat rasmiy o‘yinlarni tushunaman. Qolgan payt bizlar o‘rtoqlarmiz. Toshkentga ham raqib sifatida emas, balki o‘rtoqlik uchrashuvi o‘ynash uchun kelganmiz.
— O‘zbekistonda qaysi futbolchilarni alohida ko‘rsata olasiz?
— Sizlarda yaxshi futbolchilar ko‘p. Masalan, Odil Ahmedov, Server Jeparov, Sardor Rashidov... Terma jamoangizga qarshi o‘ynash oson emas. O‘zbekiston — Osiyoda men eng yaxshi ko‘rgan jamoalardan biri.
— Terma jamoamizga qanday ta’rif bergan bo‘lardingiz?
— Birinchi navbatda jiddiy va hurmatga sazovor raqib. Chunki sizlarda yaxshi o‘yinchilar bor, shuningdek, jamoa futbol o‘ynashni biladi. O‘zbekistonni tartibli futbol o‘ynaydigan jamoa deb hisoblayman.
— Hayotda va futbolda siz uchun eng muhim narsa nima?
— Hurmat. Nima ish qilishingdan qat’i nazar hammani hurmat qilishing kerak.
— Nima deb o‘ylaysiz, Sardor Azmun Osiyo Kubogiga qadar terma jamoaga qaytadimi?
— Ishonchim komilki, agar o‘sha paytgacha terma jamoa bosh murabbiyi bo‘lsam, Azmun, albatta, qaytadi. Men uni qaytarish uchun bor imkoniyatimni ishga solaman.
— 2012-yil Toshkentda bo‘lib o‘tgan O‘zbekiston — Eron uchrashuvi yodingizdami? O‘shanda jamoangiz 90+4-daqiqada gol urib yutib ketgandi. Yaponiyalik hakam bizning golimizni hisoblamagandi.
— Ko‘p o‘yinlar doim esimda qoladi. Men hatto kichik epizodlargacha eslashga harakat qilaman.
— O‘sha o‘yinda terma jamoamiz bosh murabbiyi Vadim Abramov bilan biroz tortishib qolgandingiz.
— O‘yin payti hamma narsa bo‘lishi mumkin. Lekin men har doim o‘z hamkasblarimni hurmat qilaman. Futbolda ikkala jamoa ham yutish uchun o‘ynaydi. Biz faqat o‘yin payti raqiblarmiz, bahs yakuniga yetgach yana do‘st bo‘lib qolaveramiz.
— Oxirgi savol. Bu yilgi Jahon chempionatida tarixda birinchi marta Osiyodan beshta jamoa qatnashdi. Lekin faqat Yaponiya guruhdan chiqa oldi. Osiyoda futbol sekin o‘syaptimi?
— Buni bir so‘z bilan harakatsizlik, ya’ni bir joyda turib qolish degan bo‘lardim. Osiyoda futbol na ko‘tarilyapti, na pastga tushyapti. Biz doim bir xil xatolarni takrorlash biland bandmiz. Yevropa ancha yuqorilab ketdi, lekin Osiyo bilan Afrika futboli hamon uyquda.
Izoh (0)