Toshkentdagi “Universal” sport majmuasida MDHga a’zo davlatlar do‘stona armiyalari o‘rtasidagi armiya qo‘l jangi musobaqasiga start berildi. Bu haqda Mudofaa vazirligi matbuot xizmati xabar berdi.
Musobaqani O‘zbekiston mudofaa vazirining tarbiyaviy va mafkuraviy ishlar bo‘yicha o‘rinbosari polkovnik Azizbek Ikramov ochib berdi.
Shundan so‘ng Toshkent harbiy okrugi harbiy xizmatchilarining, shuningdek, sportning turli yo‘nalishlari bo‘yicha Mudofaa vazirligi sport klubining bolalar sporti maktabi tarbiyalanuvchilarining ko‘rgazmali chiqishlari tomoshabinlar e’tiboriga havola etildi.
O‘zbekiston Respublikasi Qurolli Kuchlar Markaziy ashula va raqs ansamblining chiqishlari hamda ishtirokchi davlatlarning xalq qo‘shiqlarini ijro etib, yig‘ilganlar kayfiyatiga o‘zgacha ruh bag‘ishladi.
Eslatib o‘tamiz, Toshkentda o‘tkazilayotgan musobaqada Rossiya, Belarus, Qozog‘iston, Qirg‘iziston, Tojikiston hamda O‘zbekistonning qo‘l jangi sporti ustalari ishtirok etmoqda.
Izoh (0)