KXDR yangi harbiy paradga tayyorgarlik ko‘rayotgani sun’iy yo‘ldosh suratlari orqali aniqlandi
Shimoliy Koreya 9-sentabr kuni mamlakat tashkil etilganining 70 yilligiga bag‘ishlab yangi harbiy parad o‘tkazishi mumkin. Bu haqda, Planet Lab kompaniyasi tomonidan olingan sun’iy yo‘ldosh suratlarini tahlil qilib chiqqan Middlberi Xalqaro tadqiqotlar instituti jamoasiga asoslanib, Reuters agentligi xabar bermoqda.
Agentlik suhbatdoshlarining so‘zlariga ko‘ra, sentabrda bo‘lajak parad 8-fevral kuni o‘tkazilganiga o‘xshash bo‘ladi. Biroq hozircha Pxenyan ushbu paradda AQShning kontinental qismiga qadar yetib bora oladi, deb hisoblanadigan qit’alararo ballistik raketalarni namoyish etishini tasdiqlovchi biror belgi yo‘q.
Institutning tadqiqot jamoasi 22-avgust kuni olingan sun’iy yo‘ldosh suratlarida tanklar, o‘ziyurar artilleriya uskunalari, zirhli transportyorlar, zenit-raketa majmualari, raketalar va raketa uchirish qurilmalari mavjudligini qayd etgan.
