Ukrainada DXR rahbari Aleksandr Zaxarchenko o‘ldirildi

Ukrainaning Donetsk shahri markazidagi “Separ” kafesida yuz bergan portlash oqibatida Donetsk xalq respublikasi rahbari Aleksandr Zaxarchenko halok bo‘ldi. Bu haqda “TASS” va “Interfaks”ga tayanib, “Novaya gazeta” xabar berdi.

Ma’lumot DXR rahbari ma’muriyati tomonidan tasdiqlangan. Unga ko‘ra, Aleksandr Zaxarchenko terroristik hujum oqibatida halok bo‘lgan. Hodisa tafsilotlari aniqlashtirilmoqda.

Xabar berilishicha, portlash oqibatida DXR soliqlar va yig‘imlar vaziri Aleksandr Timofeyev jarohat olgan. Zaxarchenko va Timofeyevni ehtimoliy yo‘q qilinishi haqidagi mish-mishlar so‘nggi bir necha hafta davomida keng tarqalgan.

Zaxarchenkoni o‘ldirishda gumonlanayotganlar qo‘lga olingan. “Separ” kafesi Zaxarchenko qo‘riqchilari boshlig‘iga tegishli ekanligi xabar qilinmoqda.

Ukraina Xavfsizlik xizmati mamlakatning maxsus xizmatlari bu voqeaga aloqador emasligini ma’lum qilgan.