Damashq “Oq dubulg‘alar”ni kimyoviy hujumni sahnalashtirish uchun 44 bolani o‘g‘irlaganlikda aybladi

Suriya tashqi ishlar vaziri Valid Muallim matbuot anjumanida “Oq dubulg‘alar” kimyoviy hujumni sahnalashtirishda foydalanish uchun 44 nafar bolani o‘g‘irlab ketganini ma’lum qildi, deb yozadi “RIA Novosti”.

— “Oq dubulg‘alar” deb ataluvchi soxta tashkilotning yaratilishi ortida Britaniya maxsus xizmatlari turibdi — ular tashkilotga homiylik qiladi, ularni boshqaradi… Bizning ma’lumotlarimizga ko‘ra, ular yaqinda kimyoviy qurol bilan bog‘liq sahnani qo‘yish uchun Idlib hududida 44 bolani o‘g‘irlab ketgan, — dedi u.

Siyosatchi ta’kidlashicha, avvalroq kimyoviy quroldan foydalanishga aloqador soxta holatlarni yaratish ortida ham G‘arb maxsus xizmatlari turgan.

Hozir, Muallimning fikricha, AQSh Idlibda ilgari boshqa viloyatlarda amalga oshirilgan gij-gijlashlarni uyushtirishga urinmoqda, bu esa “Jibhat an-Nusra” guruhi jangarilarini himoyalash uchun qilinmoqda.