Toshkent shahar IIBB 3-avgust kuni ijtimoiy tarmoqlar va messenjerlarda tarqalgan videoyozuv bo‘yicha izoh berdi. Videoda militsiya xodimlari bir guruh yosh yigit-qizlarni ular bilan birga ichki ishlar bo‘limiga borishni so‘rayotgani, biroq ular bundan bosh tortayotgani aks etgan. Militsiya xodimlari oxiri ularni kuch bilan post-patrul xizmati mashinasiga o‘tkazishga uringan.
IIBB axborotiga ko‘ra, ushbu voqea 6-iyuliga o‘tar kechasi, soat taxminan tungi 3:30 da yuz bergan. “26 yoshli Artyom, 21 yoshli Nikita va 23 yoshli Aleksandra mast holda Yunusobod tumanining Istiqlol ko‘chasi avtomobil qatnov yo‘lidan yurib, transport qatnoviga xalal bergan, tunda shovqin ko‘tarib, jamoat tartibini buzgan”, — deyiladi rasmiy axborotda.
Voqea joyiga yetib kelgan patrul-post xizmati xodimlari yoshlarni qatnov qismini tark etib, trotuardan yurishga chaqirgan, biroq IIBB axborotida ta’kidlanishicha, yoshlar militsiya xodimlarining talabini bajarishdan bosh tortgan.
“Shuningdek, shaxsni tasdiqlovchi hujjatlarni taqdim etishni ham istashmagan. Ulardan ikki nafari hujjatlari yonida emasligini aytgan bo‘lsa, Artyom pasportini huquq posbonlarining qo‘liga bermagan”, — deyiladi IIBB izohida.
Shundan so‘ng, ulardan xodimlar bilan birga ichki ishlar bo‘limiga borishlari so‘ralgan. Biroq ular militsiya xodimlarining talablarini rad etgan. “Qolaversa, odob-axloq chegarasidan o‘tib, o‘zlarini tuta bilishmadi”, — deb yozadi IIBB matbuot xizmati.
Shunga ko‘ra, ularning uchalasiga nisbatan ma’muriy javobgarlik to‘g‘risidagi bayonnoma tuzildi. O‘z navbatida, Yunusobod tuman ma’muriy sudi Artyomni Ma’muriy javobgarlik to‘g‘risidagi kodeksning 194-moddasiga (“Militsiya xodimining qonuniy talablarini bajarmaslik”) asosan aybdor deb topib, unga nisbatan jarima belgilash haqida qaror qabul qildi.
“Qolgan ikki nafar huquqbuzarlarga esa ogohlantirish berildi”, — deyiladi IIBB axborotida.
Izoh (0)