Тошкент шаҳар ИИББ 3 август куни ижтимоий тармоқлар ва мессенжерларда тарқалган видеоёзув бўйича изоҳ берди. Видеода милиция ходимлари бир гуруҳ ёш йигит-қизларни улар билан бирга ички ишлар бўлимига боришни сўраётгани, бироқ улар бундан бош тортаётгани акс этган. Милиция ходимлари охири уларни куч билан пост-патруль хизмати машинасига ўтказишга уринган.
ИИББ ахборотига кўра, ушбу воқеа 6 июлига ўтар кечаси, соат тахминан тунги 3:30 да юз берган. «26 ёшли Артём, 21 ёшли Никита ва 23 ёшли Александра маст ҳолда Юнусобод туманининг Истиқлол кўчаси автомобиль қатнов йўлидан юриб, транспорт қатновига халал берган, тунда шовқин кўтариб, жамоат тартибини бузган», — дейилади расмий ахборотда.
Воқеа жойига етиб келган патруль-пост хизмати ходимлари ёшларни қатнов қисмини тарк этиб, тротуардан юришга чақирган, бироқ ИИББ ахборотида таъкидланишича, ёшлар милиция ходимларининг талабини бажаришдан бош тортган.
«Шунингдек, шахсни тасдиқловчи ҳужжатларни тақдим этишни ҳам исташмаган. Улардан икки нафари ҳужжатлари ёнида эмаслигини айтган бўлса, Артём паспортини ҳуқуқ посбонларининг қўлига бермаган», — дейилади ИИББ изоҳида.
Шундан сўнг, улардан ходимлар билан бирга ички ишлар бўлимига боришлари сўралган. Бироқ улар милиция ходимларининг талабларини рад этган. «Қолаверса, одоб-ахлоқ чегарасидан ўтиб, ўзларини тута билишмади», — деб ёзади ИИББ матбуот хизмати.
Шунга кўра, уларнинг учаласига нисбатан маъмурий жавобгарлик тўғрисидаги баённома тузилди. Ўз навбатида, Юнусобод туман маъмурий суди Артёмни Маъмурий жавобгарлик тўғрисидаги кодекснинг 194-моддасига («Милиция ходимининг қонуний талабларини бажармаслик») асосан айбдор деб топиб, унга нисбатан жарима белгилаш ҳақида қарор қабул қилди.
«Қолган икки нафар ҳуқуқбузарларга эса огоҳлантириш берилди», — дейилади ИИББ ахборотида.
Изоҳ (0)