Toshkent shahar hokimligida Jamoatchilik kengashining ilk matbuot brifingi bo‘lib o‘tdi. Bu haqda hokimlik matbuot xizmati xabar berdi.
Tadbirda Jamoatchilik kengashi vakillari tomonidan ikki oylik ish faoliyati natijalari to‘g‘risida xulosalar chiqarildi, yo‘nalishlar bo‘yicha ish-rejalari taqdim etildi hamda OAV vakillari va shahar aholisining savollariga atroflicha javob berildi.
Matbuot brifingida Jamoatchilik kengashi vakillarining qisqa bayonotlari eshitildi. Bunda kengash tomonidan bajarilgan ishlar, xususan, loyihalarning amaliy choralari haqida so‘z yuritildi.
Jamoatchilik kengashi raisi Hikmat Abduraxmanov, rais o‘rinbosari Diyor Mirzaaxmedov hamda Atrof-muhitni muhofaza qilish qo‘mitasi rahbari Aleksey Volkov so‘zga chiqdi va tadbir ishtirokchilariga batafsil ma’lumot berdi.
Jamoatchilik kengashi vakillari tomonidan oraliq natijalar eshittirildi, muhim yo‘nalishlar bo‘yicha amalga oshiriladigan kelgusi rejalar taqdim etildi. Kengashning profil qo‘mitalari tuzilib, ushbu qo‘mitalar rahbarlari saylandi, yagona ish faoliyati strategiyasi ishlab chiqildi.
Jamoatchilik kengashi raisi Hikmat Abduraxmanov o‘z chiqishida quyidagi yo‘nalishlar bo‘yicha alohida to‘xtaldi:- Shaharni uzoq muddatli strategik rivojlantirish;
- Hokimlikning ochiqligi va faolligini kuchaytirishda hamkorlik qilish, davlat buyurtmalari, davlat idoralari mulklari, biznes-loyihalarning shaffofligini ta’minlash;
- Toshkent shahrining yashilligini saqlab qolish;
- Shaharning ommabop muhitini va inklyuziv jamoatchilikni yaratish;
- Shaharda tadbirkorlikni rivojlantirish va xizmat sohasi ulushini orttirish.
Atrof-muhitni muhofaza qilish qo‘mitasi rahbari Aleksey Volkov bugungi kunda dolzarb bo‘lib qolgan muammolardan biri — daraxtlarning noqonuniy kesilishi borasida izoh berdi:
—Jamoatchilik kengashi shahar hokimligiga yozma ravishda murojaat qilib, daraxtlarni noqonuniy kesishga qarshi kurashish borasida 12 ta taklifni bildirdi. Bizning fikrimizcha, bulardan eng muhimlari quyidagilar:
- Kasal va qurigan daraxtlarni kesish bilan bog‘liq ruxsatnomalar hokimlik saytida joylashtiriladi;
- Bunday daraxtlar faqatgina shahar obodonlashtirish xizmati tomonidan kesib tashlanadi. Kesib tashlanishi mo‘ljallangan daraxtlarga oldindan belgilar qo‘yib chiqiladi;
- Barcha daraxtlar rasmiy ravishda yer uchastkalari kadastriga kiritiladi, qurilishga ruxsat berish hududdagi daraxtlar soniga bog‘liq bo‘ladi. Quruvchi tashkilot bitta kesib tashlangan daraxt o‘rniga 10 ta daraxtning ekilishini ta’minlashga majbur.
Izoh (0)