Jurnalist Nikita Makarenko Oliy Majlis Qonunchilik palatasining shahar va qishloqlarda daraxtlarni muhofaza qilish tizimini isloh etish to‘g‘risidagi petitsiya bo‘yicha qaroridan qoniqish hosil qilmaganini ma’lum qildi. Bu haqda “Gazeta.uz” xabar bermoqda.
“Shahar va qishloq hududlarda daraxtlarni muhofaza qilish tizimini isloh etish to‘g‘risida”gi elektron jamoaviy murojaat aynan jurnalist Nikita Makarenko muallifligida tayyorlangan va “Mening fikrim” portaliga joylashtirilgan edi. Jamoaviy murojaat 12 mingdan ortiq ovoz olib, Oliy Majlis Qonunchilik palatasi ko‘rib chiqishi kerak bo‘lgan petitsiyalar qatoridan o‘rin olgan edi.
“Mening fikrim” portalida 1-avgust kuni deputatlarning ushbu jamoaviy murojaat bo‘yicha qarori e’lon qilindi. Unda deputatlar daraxtlarni kesishga nisbatan moratoriy joriy etish taklifini ma’qullamagan, bir gap bilan aytganda: “Daraxt kesishni taqiqlashning imkoni yo‘q”, deb munosabat bildirgan. Bunday munosabat jamoaviy murojaat muallifini qoniqtirmadi.
Mavzuga doir: “Daraxt kesishni taqiqlashning imkoni yo‘q” — Deputatlar jamoaviy murojaatga javob berdi
“Qarorda daraxtlarni qutqarib, ularni muhofaza qilishga yordam beradigan birorta qat’iy chora yo‘q. Jarimalarni ikki oy ichida oshirish — bu biz kutgan narsa emas. Jamoatchilik keskin bir islohot kutgandi, biroq deputatlar bu islohotni qo‘llab-quvvatlashni istamadi. Ijtimoiy tarmoqlardagi munosabatlardan kelib chiqsak, odamlarning hafsalasi juda pir bo‘lgan”, — dedi jurnalist.
“Daraxtlar kesilishi masalasi hamon ochiq qolmoqda, daraxtlar hamon himoyasiz. Mening nazarimda, hozirgidek ko‘rinishdagi jamoaviy murojaatlar g‘oyasi o‘zini obro‘sizlantirib bo‘ldi. Bunday mexanizm muammolarni hal qila olmasligi ochiq ko‘rinib qoldi”, — deya qo‘shimcha qildi Nikita Makarenko.
Izoh (0)