O‘zbekistonda meva-sabzavot uchun eksport kontraktlarini “O‘zagroeksport” kompaniyasi e’lon qilgan narxlardan past bo‘lmagan narxlar bo‘yicha tuzishga doir majburiy tartib bekor qilindi. Bu O‘zbekiston Prezidenti tomonidan 1-avgust kuni imzolangan “O‘zbekiston Respublikasida investitsion muhitni tubdan yaxshilash chora-tadbirlari to‘g‘risida”gi farmonda ko‘zda tutilgan.
Shu bilan birga eksport kontrakti tuzmasdan invoys asosida o‘tkaziladigan meva-sabzavot mahsulotlarini bojxonada bojxona yuk deklaratsiyasi ro‘yxatga olinadigan kunda “O‘zagroeksport” rasmiy veb-saytida qayd etilgan narxlardan past bo‘lmagan narxlar bo‘yicha rasmiylashtirish tartibi ham bekor qilindi.
Ushbu tartib O‘zbekiston hukumatining 2017-yil dekabridagi qarori bilan joriy etilgan edi. Uni bekor qilish bo‘yicha taklif Adliya vazirligi, Iqtisodiyot vazirligi va Davlat raqobat qo‘mitasi tomonidan tayyorlangan. Avvalroq tadbirkorlar o‘z mahsulotlarini “O‘zagroeksport” belgilagan narxlardan past narxda xorijga sota olmayotganidan ko‘p norozilik bildirgan edi.
O‘zbekistonda yetishtirilgan yangi meva-sabzavot mahsulotlarini tashqi bozorlarga yetkazib berish bo‘yicha monopoliyani qo‘lga kiritgan “O‘zagroekspert” ixtisoslashgan tashqi savdo kompaniyasi 2016-yil aprelida tashkil etilgan. O‘zbekiston Prezidentining 2017-yil iyulidagi qarori bilan u monopoliya huquqidan mahrum bo‘lgan edi, deb yozadi “Gazeta.uz”.
Izoh (0)