Ўзбекистонда мева-сабзавот учун экспорт контрактларини «Ўзагроэкспорт» компанияси эълон қилган нархлардан паст бўлмаган нархлар бўйича тузишга доир мажбурий тартиб бекор қилинди. Бу Ўзбекистон Президенти томонидан 1 август куни имзоланган «Ўзбекистон Республикасида инвестицион муҳитни тубдан яхшилаш чора-тадбирлари тўғрисида»ги фармонда кўзда тутилган.
Шу билан бирга экспорт контракти тузмасдан инвойс асосида ўтказиладиган мева-сабзавот маҳсулотларини божхонада божхона юк декларацияси рўйхатга олинадиган кунда «Ўзагроэкспорт» расмий веб-сайтида қайд этилган нархлардан паст бўлмаган нархлар бўйича расмийлаштириш тартиби ҳам бекор қилинди.
Ушбу тартиб Ўзбекистон ҳукуматининг 2017 йил декабридаги қарори билан жорий этилган эди. Уни бекор қилиш бўйича таклиф Адлия вазирлиги, Иқтисодиёт вазирлиги ва Давлат рақобат қўмитаси томонидан тайёрланган. Аввалроқ тадбиркорлар ўз маҳсулотларини «Ўзагроэкспорт» белгилаган нархлардан паст нархда хорижга сота олмаётганидан кўп норозилик билдирган эди.
Ўзбекистонда етиштирилган янги мева-сабзавот маҳсулотларини ташқи бозорларга етказиб бериш бўйича монополияни қўлга киритган «Ўзагроэксперт» ихтисослашган ташқи савдо компанияси 2016 йил апрелида ташкил этилган. Ўзбекистон Президентининг 2017 йил июлидаги қарори билан у монополия ҳуқуқидан маҳрум бўлган эди, деб ёзади «Газета.uz».
Изоҳ (0)