O‘zbekiston Prezidenti Shavkat Mirziyoyev raisligida 31-iyul kuni bo‘lib o‘tgan videoselektor yig‘ilishida g‘alladan bo‘shagan maydonlarga takroriy ekinlar ekish, shartnoma tuzish va bo‘nak mablag‘lari berish masalalariga alohida e’tibor qaratildi. Bu haqda Prezident matbuot xizmati xabar bermoqda.
“Bugungi kunda dunyoda oziq-ovqat mahsulotlariga talab va ularning narx-navosi oshib bormoqda. Bunday sharoitda qishloq xo‘jaligi mahsulotlari yetishtirishni ko‘paytirib, ichki bozorni arzon oziq-ovqat bilan to‘ldirish va eksport hajmini oshirish juda muhim hisoblanadi”, — deyiladi rasmiy axborotda.
Shu maqsadda joriy yilda g‘alladan bo‘shagan 680 ming gektar maydonga takroriy ekin ekish belgilangan. “Lekin oradan bir oydan ko‘proq vaqt o‘tgan bo‘lsa-da, joylarda ekish ishlari tizimli tashkil qilinmagan, to‘liq yakuniga yetkazilmagan”, — deya qo‘shimcha qiladi Prezident matbuot xizmati.Takroriy ekin, bu – birinchi navbatda eksport. Ikkinchidan, oziq-ovqat mahsulotlarining zaxirasi, ya’ni ichki bozordagi to‘kinlik va barqaror narx-navo degani.Yig‘ilishda mutasaddi rahbarlarga takroriy ekinlar uchun zarur bo‘lgan moddiy-texnik resurslarni to‘liq yetkazib berish va agrotexnik tadbirlarni o‘z vaqtida o‘tkazish, mahsulotlarni xarid qilish bo‘yicha qayta ishlash korxonalari, eksportyor va tayyorlov tashkilotlari bilan shartnomalar tuzish, fermerlarga bo‘nak pullarini to‘lash yuzasidan topshiriqlar berildi.Shavkat Mirziyoyev, O‘zbekiston Prezidenti
Izoh (0)