Joriy yilning 4—7-oktabr kunlari O‘zbekistonda televideniye sohasiga bag‘ishlangan yirik xalqaro festival bo‘lib o‘tadi. Bu “Rossiya televideniye akademiyasi” jamg‘armasi tomonidan bir necha yildan buyon Mustaqil Davlatlar Hamdo‘stligi va yaqin xorijdagi televideniye ijodkorlari o‘rtasida o‘tkazib kelinayotgan“TEFI Hamdo‘stlik” xalqaro televizion festivalidir, deb yozadi O‘zA.
“TEFI Hamdo‘stlik” o‘z nufuzi bilan dunyodagi ayni sohaga bag‘ishlangan boshqa yirik festivallardan qolishmaydi. Xalqaro televizion festivalga 2011-yilda asos solingan bo‘lib, u ilk kunlardanoq MDHga a’zo mamlakatlar gumanitar hamkorligi jamg‘armasi va Rossiya matbuot va ommaviy kommunikatsiyalar federal agentligi tomonidan rag‘batlantirilib kelinmoqda.
Hamdo‘stlik mamlakatlarida yagona axborot makonini shakllantirishni maqsad qilgan festivalga har yili MDHning biror mamlakati mezbonlik qiladi. Festival mavzulari ham xilma-xil. “TEFI Hamdo‘stlik” doirasida ekspertlar kengashi tuziladi, sohaning tajribali mutaxassislari ishtirokida mahorat darslari, zamonaviy televideniyening dolzarb muammolariga bag‘ishlangan munozaralar, televizon ijodiy ishlar muhokamalari, ochiq suhbatlar o‘tkaziladi. Festival yakunida g‘oliblarga maxsus mukofotlar topshiriladi.
O‘tgan yili Minsk shahrida o‘tgan “TEFI Hamdo‘stlik — 2017” festivalida O‘zbekiston Milliy teleradiokompaniyasi tomonidan suratga olingan “Chorak asr shiddati: Surxondaryo” hujjatli filmi yuksak e’tirofga sazovor bo‘lgan edi.
Shu kunlarda “TEFI Hamdo‘stlik — 2018”ga ijodiy ishlar topshirish muddati yakunlandi. Bu yil festival “Vatan obrazi: vaqt, makon, taqdir” mavzusida o‘tkaziladi.
“Festivalga mavzu tanlashda MDH xalqlarining milliy o‘ziga xosligi, ishtirokchilarning qiziqishlarini inobatga olamiz. Misol uchun, ‘TEFI Hamdo‘stlik’ning o‘tgan yillardagi bosh mavzulari axborot teledasturlari, bolalar televideniyesi, musiqiy va ko‘ngilochar dasturlarga bag‘ishlangan edi. Bu yilgi festival mavzusi Hamdo‘stlik davlatlarining hamjihatligiga qaratilgan”, — deydi “Rossiya televideniye akademiyasi” jamg‘armasi direktori Eteri Leviyeva.
Izoh (0)