Жорий йилнинг 4—7 октябрь кунлари Ўзбекистонда телевидение соҳасига бағишланган йирик халқаро фестиваль бўлиб ўтади. Бу «Россия телевидение академияси» жамғармаси томонидан бир неча йилдан буён Мустақил Давлатлар Ҳамдўстлиги ва яқин хориждаги телевидение ижодкорлари ўртасида ўтказиб келинаётган«TEFI Ҳамдўстлик» халқаро телевизион фестивалидир, деб ёзади ЎзА.
«TEFI Ҳамдўстлик» ўз нуфузи билан дунёдаги айни соҳага бағишланган бошқа йирик фестиваллардан қолишмайди. Халқаро телевизион фестивалга 2011 йилда асос солинган бўлиб, у илк кунларданоқ МДҲга аъзо мамлакатлар гуманитар ҳамкорлиги жамғармаси ва Россия матбуот ва оммавий коммуникациялар федерал агентлиги томонидан рағбатлантирилиб келинмоқда.
Ҳамдўстлик мамлакатларида ягона ахборот маконини шакллантиришни мақсад қилган фестивалга ҳар йили МДҲнинг бирор мамлакати мезбонлик қилади. Фестиваль мавзулари ҳам хилма-хил. «TEFI Ҳамдўстлик» доирасида экспертлар кенгаши тузилади, соҳанинг тажрибали мутахассислари иштирокида маҳорат дарслари, замонавий телевидениенинг долзарб муаммоларига бағишланган мунозаралар, телевизон ижодий ишлар муҳокамалари, очиқ суҳбатлар ўтказилади. Фестиваль якунида ғолибларга махсус мукофотлар топширилади.
Ўтган йили Минск шаҳрида ўтган «TEFI Ҳамдўстлик — 2017» фестивалида Ўзбекистон Миллий телерадиокомпанияси томонидан суратга олинган «Чорак аср шиддати: Сурхондарё» ҳужжатли фильми юксак эътирофга сазовор бўлган эди.
Шу кунларда «TEFI Ҳамдўстлик — 2018»га ижодий ишлар топшириш муддати якунланди. Бу йил фестиваль «Ватан образи: вақт, макон, тақдир» мавзусида ўтказилади.
«Фестивалга мавзу танлашда МДҲ халқларининг миллий ўзига хослиги, иштирокчиларнинг қизиқишларини инобатга оламиз. Мисол учун, ‘TEFI Ҳамдўстлик’нинг ўтган йиллардаги бош мавзулари ахборот теледастурлари, болалар телевидениеси, мусиқий ва кўнгилочар дастурларга бағишланган эди. Бу йилги фестиваль мавзуси Ҳамдўстлик давлатларининг ҳамжиҳатлигига қаратилган», — дейди «Россия телевидение академияси» жамғармаси директори Этери Левиева.
Изоҳ (0)