26-iyun — Xalqaro giyohvandlikka va giyohvand vositalarning noqonuniy aylanishiga qarshi kurash kuni munosabati bilan, xalqaro majburiyatlarni bajarish maqsadida davlat xavfsizlik xizmati huquqni muhofaza qilish idoralari tomonidan narkobiznesga qarshi kurashish davomida musodara qilingan giyohvandlik vositalarining navbatdagi to‘plamini yo‘q qilish tadbirini o‘tkazdi.
Ushbu tadbirda mamlakatdagi diplomatik korpuslar, BMTning narkotiklar va jinoyatchilik bo‘yicha boshqarmasi, Yevropada xavfsizlik va hamkorlik tashkiloti vakillari, OAV xodimlari va keng jamoatchilik vakillari ishtirok etdi.
Tadbir ishtirokchilariga tezkor xodimlar giyohvand moddalarni aniqlash jarayonini ko‘rsatib berdi. Shundan so‘ng yig‘ilganlar ko‘z o‘ngida 15 kilogram 619 gramm geroin, 1 tonna 1 kilogramm 688 gramm opiy, 98 kilogramm 733 gramm gashish, 406 kilogramm 234 gramm marixuana, 55 kilogramm 60 gramm ko‘knor, 1,4 grammdan ortiq yangi turdagi psixofaol vositalar (“Spays” va boshqalar) hamda 27 kilogramm 472 gramm kannabis va psixotrop moddalar yoqib yuborildi.
Qayd etilishicha, giyohvandlik vositalarini yetishtirishda jahonda birinchi o‘rinlarda turadigan davlatlardan sanaladigan Afg‘oniston bilan chegaradoshlik O‘zbekistondagi narkovaziyatga salbiy ta’sir ko‘rsatmoqda. Xalqaro ekspertlarning ma’lumotlariga ko‘ra, 2017-yilda Afg‘onistonda ko‘knori yetishtiriladigan maydonlar 328 ming gektarni (2016-yilda 201 ming gektar), ishlab chiqarilgan opiy miqdori 9000 tonnani ( 2016-yilda 4800 tonna) tashkil etgan.
O‘zbekistonda 2017-yilda giyohvand moddalarning noqonuniy aylanmasi bilan bog‘liq 5429 ta jinoyat fosh etildi. O‘tgan yilda giyohvandlik vositalari bilan bog‘liq jinoyatlarni amalga oshirganligi uchun ushlangan shaxslarning 45 nafari chet el fuqarolarini tashkil etib, ulardan 18 nafari Afg‘oniston, 14 nafari Tojikiston, 8 nafari Qozog‘iston hamda 2 nafari Rossiya fuqarolaridir. Ulardan 267,7 kilogram giyohvandlik vositalari, 516 ta psixotrop tabletkalar musodara qilib olingan.
Izoh (0)