26 июнь — Халқаро гиёҳвандликка ва гиёҳванд воситаларнинг ноқонуний айланишига қарши кураш куни муносабати билан, халқаро мажбуриятларни бажариш мақсадида давлат хавфсизлик хизмати ҳуқуқни муҳофаза қилиш идоралари томонидан наркобизнесга қарши курашиш давомида мусодара қилинган гиёҳвандлик воситаларининг навбатдаги тўпламини йўқ қилиш тадбирини ўтказди.
Ушбу тадбирда мамлакатдаги дипломатик корпуслар, БМТнинг наркотиклар ва жиноятчилик бўйича бошқармаси, Европада хавфсизлик ва ҳамкорлик ташкилоти вакиллари, ОАВ ходимлари ва кенг жамоатчилик вакиллари иштирок этди.
Тадбир иштирокчиларига тезкор ходимлар гиёҳванд моддаларни аниқлаш жараёнини кўрсатиб берди. Шундан сўнг йиғилганлар кўз ўнгида 15 килограм 619 грамм героин, 1 тонна 1 килограмм 688 грамм опий, 98 килограмм 733 грамм гашиш, 406 килограмм 234 грамм марихуана, 55 килограмм 60 грамм кўкнор, 1,4 граммдан ортиқ янги турдаги психофаол воситалар («Спайс» ва бошқалар) ҳамда 27 килограмм 472 грамм каннабис ва психотроп моддалар ёқиб юборилди.
Қайд этилишича, гиёҳвандлик воситаларини етиштиришда жаҳонда биринчи ўринларда турадиган давлатлардан саналадиган Афғонистон билан чегарадошлик Ўзбекистондаги нарковазиятга салбий таъсир кўрсатмоқда. Халқаро экспертларнинг маълумотларига кўра, 2017 йилда Афғонистонда кўкнори етиштириладиган майдонлар 328 минг гектарни (2016 йилда 201 минг гектар), ишлаб чиқарилган опий миқдори 9000 тоннани ( 2016 йилда 4800 тонна) ташкил этган.
Ўзбекистонда 2017 йилда гиёҳванд моддаларнинг ноқонуний айланмаси билан боғлиқ 5429 та жиноят фош этилди. Ўтган йилда гиёҳвандлик воситалари билан боғлиқ жиноятларни амалга оширганлиги учун ушланган шахсларнинг 45 нафари чет эл фуқароларини ташкил этиб, улардан 18 нафари Афғонистон, 14 нафари Тожикистон, 8 нафари Қозоғистон ҳамда 2 нафари Россия фуқароларидир. Улардан 267,7 килограм гиёҳвандлик воситалари, 516 та психотроп таблеткалар мусодара қилиб олинган.
Изоҳ (0)