20-iyun, chorshanba kuni Samarqand davlat chet tillari instituti qoshidagi Smart English til markazi o‘quvchilari shahar tashqarisidagi Oq Bo‘yro dam olish maskani yo‘lidagi 1 kilometrga cho‘zilgan maydonda sellofan paketlarni yig‘ishtirdi. Bu haqda Smart English til markazi matbuot xizmati “Daryo”ga xabar berdi.
“Har kuni bu yo‘ldan yuzlab odamlar dam olish maskaniga yo‘l oladi, o‘nlab mashinalar o‘tadi. Ko‘chaning ikki tomoni shamol uchirib kelgan va mashinalardan uloqtirilgan chiqindilar bilan to‘lgan”, — deydi Piknic oromgohi egasi Akmal Omonqulov, — Bir guruh yoshlar bu yerni ozoda qilish istagini bildirib qo‘ng‘iroq qilganida behad mamnun bo‘ldik”.
“Yaqinda atrof muhit va tabiat muammolari mavzusiga bag‘ishlangan darsimizda “Chiqindilar okeani” (Ocean of Garbage) videosini tomosha qildik va Tinch okeani bo‘ylab suzayotgan chiqindilar, sellofan paketlarni ko‘rib juda ta’sirlandik. Biz yurtimizda bunday holatlar bo‘lmasligi tarafdorimiz. Guruhimiz bilan dam olish maskani yo‘lidagi plastik paketlarni yig‘ib, oz bo‘lsa-da viloyatimiz ozodaligiga o‘z hissamizni qo‘shishga qaror qildik”, — deydi markaz o‘quvchilaridan biri Fariza Qosimova.
“Biz bu kichik ishimiz bilan ko‘p narsani o‘zgartira olmagan bo‘lsak-da, ommani bunday tadbirlar va savob qilishga chaqira olsak, hech bo‘lmasa, duch kelgan joyga chiqindi uloqtirmaslikka ozgina bo‘lsa ham unday olsak, bundan baxtiyormiz”, — deydi markazning yana bir o‘quvchisi Feruza Primova.
Ma’lumot uchun
Sellofan paketlar yemirilishi uchun 500 yildan 1000 yil kerak bo‘ladi. Yevropa Ittifoqida yiliga 800 ming tonna bir martalik plastik paketlar (sellofan) ishlatiladi va ularning bor-yo‘g‘i 6 foizigina qayta ishlab chiqariladi. Har yili dunyo bo‘ylab 4 milliard plastik paketlar axlatga uloqtiriladi. Sellofan paketlar chirimaydi va suvda yemirilmaydi, biroq mayda zaharli bo‘laklarga parchalanishi mumkin.
Izoh (0)