20 июнь, чоршанба куни Самарқанд давлат чет тиллари институти қошидаги Smart English тил маркази ўқувчилари шаҳар ташқарисидаги Оқ Бўйро дам олиш маскани йўлидаги 1 километрга чўзилган майдонда целлофан пакетларни йиғиштирди. Бу ҳақда Smart English тил маркази матбуот хизмати «Дарё»га хабар берди.
«Ҳар куни бу йўлдан юзлаб одамлар дам олиш масканига йўл олади, ўнлаб машиналар ўтади. Кўчанинг икки томони шамол учириб келган ва машиналардан улоқтирилган чиқиндилар билан тўлган», — дейди Пикниc оромгоҳи эгаси Акмал Омонқулов, — Бир гуруҳ ёшлар бу ерни озода қилиш истагини билдириб қўнғироқ қилганида беҳад мамнун бўлдик».
«Яқинда атроф муҳит ва табиат муаммолари мавзусига бағишланган дарсимизда «Чиқиндилар океани» (Ocean of Garbage) видеосини томоша қилдик ва Тинч океани бўйлаб сузаётган чиқиндилар, целлофан пакетларни кўриб жуда таъсирландик. Биз юртимизда бундай ҳолатлар бўлмаслиги тарафдоримиз. Гуруҳимиз билан дам олиш маскани йўлидаги пластик пакетларни йиғиб, оз бўлса-да вилоятимиз озодалигига ўз ҳиссамизни қўшишга қарор қилдик», — дейди марказ ўқувчиларидан бири Фариза Қосимова.
«Биз бу кичик ишимиз билан кўп нарсани ўзгартира олмаган бўлсак-да, оммани бундай тадбирлар ва савоб қилишга чақира олсак, ҳеч бўлмаса, дуч келган жойга чиқинди улоқтирмасликка озгина бўлса ҳам ундай олсак, бундан бахтиёрмиз», — дейди марказнинг яна бир ўқувчиси Феруза Примова.
Маълумот учун
Целлофан пакетлар емирилиши учун 500 йилдан 1000 йил керак бўлади. Европа Иттифоқида йилига 800 минг тонна бир марталик пластик пакетлар (целлофан) ишлатилади ва уларнинг бор-йўғи 6 фоизигина қайта ишлаб чиқарилади. Ҳар йили дунё бўйлаб 4 миллиард пластик пакетлар ахлатга улоқтирилади. Целлофан пакетлар чиримайди ва сувда емирилмайди, бироқ майда заҳарли бўлакларга парчаланиши мумкин.
Изоҳ (0)