Turkiyaning “Istanbul Bashakshehir” klubi matbuot xizmati Moskvaning “SSKA” jamoasi yarim himoyachisi Abbosbek Fayzullayevning ehtimoliy transferi haqida izoh berdi. Bu haqda Match TV nashri xabar bermoqda.
Bizda bu borada hech qanday ma’lumot yo‘q. Hozirda jamoa Avstriyada yangi mavsumga tayyorgarlik ko‘rmoqda, — deya klub matbuot xizmatining so‘zlarini keltiradi manba.
Avvalroq bir qator OAVda tarqalgan xabarlarga ko‘ra, “Bashakshehir” va “SSKA” klublari o‘zbekistonlik futbolchining transferi borasida kelishuvga erishgan. Unda yozilishicha, bitim summasi 7 million yevro atrofida bo‘lishi kutilmoqda.
Eslatib o‘tamiz, 21 yoshli yarim himoyachining “SSKA” bilan amaldagi shartnomasi 2026-yil yozigacha mo‘ljallangan. Transfermarkt portali Fayzullayevning qiymatini 8 million yevroga baholamoqda.
Ma’lumot uchun, avvalroq istanbulliklar O‘zbekiston terma jamoasining boshq abir futbolchisi — hujumchi Eldor Shomurodov bilan shartnoma imzolagan edi. “Bashakshehir” Shomurodovni “Roma”dan bir mavsumga ijaraga olgandi. Shuningdek, kelishuvda uni 2,7 million yevroga sotib olish bandi ham kiritilgan.
Izoh (0)