O‘zAda jurnalist Rustam Jabborovning buyuk mutafakkir Alisher Navoiy tavalludining 500 yilligi Sankt-Peterburg shahrida Ikkinchi Jahon urushi vaqtida ham nishonlangani haqidagi maqolasi chop etildi.
Rossiyaning Sankt-Peterburg shahrida “O‘zbekiston madaniy merosi – xalqlar va mamlakatlar o‘rtasida muloqotga yo‘l” Ikkinchi xalqaro kongressi davom etmoqda.
Kongress doirasida “O‘zbekiston madaniy merosi Davlat Ermitaji to‘plamlarida” kitob-albomining taqdimoti o‘tkazildi.
Ta’kidlash joizki, Sankt-Peterburgdagi Davlat Ermitaji sayyoradagi eng katta va mashhur muzeylardan sanaladi. Bu yerda o‘zbek xalqi va davlatchiligi tarixiga oid juda katta miqdordagi madaniy yodgorliklar saqlanmoqda. O‘tgan asrda O‘zbekiston hududida olib borilgan arxeologik ekspeditsiyalar davomida topilgan osori atiqalar, turli davrlarga oid tangalar, qo‘lyozmalar va hujjatlar, xalq amaliy san’ati namunalari, zargarlik, miskarlik va kandakorlik mahsulotlari o‘zbek xalqining boy va betakror tarixi, buyuk madaniyati ifodasi sifatida muzey ekspozitsiyalarida namoyish etib kelinmoqda.
“Sankt-Peterburg O‘zbekiston madaniy merosini o‘rganish va targ‘ib etishda katta ahamiyatga ega. Ikkinchi Jahon urushi davrida, shahar qamalda qolgan paytda ham bu yerda buyuk o‘zbek shoiri Alisher Navoiyning 500 yilligi nishonlangani ham fikrimni to‘la isbotlaydi. Davlat Ermitajida o‘zbek madaniyatining bebaho durdonalari saqlanmoqda. O‘ylaymanki, O‘zbekiston madaniy merosini targ‘ib etishda Ermitajning o‘z o‘rni bor. Biz kelgusida turli mamlakatlarda Ermitaj kunlarini o‘tkazish, muzey xodimlari o‘rtasida o‘zaro tajriba almashishni yo‘lga qo‘yish bo‘yicha muzokaralar olib boryapmiz. Ehtimol, O‘zbekistonda ham shunday tadbirlarni o‘tkazish vaqti kelgandir. Chunki bugungi kunda mamlakatingizda tarixiy merosni asrab-avaylash borasida havas qilishga arzigulik ishlar amalga oshirilmoqda. Bugungi xalqaro kongressni bu yo‘ldagi muhim qadam sifatida baholash mumkin”, – deydi Davlat Ermitaji direktori Mixail Piotrovskiy.
Izoh (0)