“Ijtimoiy fikr” jamoatchilik fikrini o‘rganish markazi “Fuqarolar O‘zbekiston Respublikasi Prezidenti haqida” mavzucida ijtimoiy so‘rov o‘tkazdi. Bu haqda O‘zA xabar bermoqda.
Tadqiqot o‘zbekistonliklar Shavkat Mirziyoyevning Prezident lavozimidagi faoliyatini yuqori baholayotganini ko‘rsatdi. Fuqarolarning mutlaq ko‘pchiligi, ya’ni 91,9 foizi amalga oshirilayotgan siyosiy va ijtimoiy-iqtisodiy islohotlarni, hayotning barcha sohalarini yanada modernizatsiya qilish, har tomonlama va jadal rivojlantirish, har bir fuqaro va butun jamiyat manfaatlarini ro‘yobga chiqarish borasida ko‘rilayotgan chora-tadbirlarni ma’qullamoqda va qo‘llab-quvvatlamoqda.
Ijtimoiy so‘rov natijalari tahlili fuqarolarning Prezident Shavkat Mirziyoyev faoliyatiga bergan bahosida ijobiy o‘sish kuzatilayotganini ko‘rsatdi. Xususan, bu raqam 2017-yil oktabrdagi 89,3 foizdan 2018-yil mayda 91,9 foizga yetdi.
“O‘zbekiston Respublikasi Prezidenti Shavkat Mirziyoyev tomonidan amalga oshirilayotgan siyosat sizning ishonchingiz va umidlaringizni qay darajada oqladi?” degan savolga so‘rov ishtirokchilarining mutlaq ko‘pchiligi, ya’ni 92,5 foizi “to‘liq oqladi”, deb javob bergan. Shunday fikrdagi fuqarolar soni 2017-yildagiga nisbatan 2,3 foizga ortgani aniqlandi.
Ishtirokchilarning aksariyati — 92,2 foizi “O‘zbekiston Respublikasi Prezidenti Shavkat Mirziyoyev tomonidan amalga oshirilayotgan ichki siyosatni qay darajada qo‘llab-quvvatlaysiz?”, degan savolga javoban to‘liq qo‘llab-quvvatlashini bildirdi.
Mamlakat aholisining mutlaq ko‘pchiligi, ya’ni 92,2 foizi davlat manfaatlarini xalqaro maydonda himoya qilish, xorijiy mamlakatlar bilan ikki va ko‘p tomonlama hamkorlikni rivojlantirish, O‘zbekistonning jahondagi nufuzini yuksaltirish borasida amalga oshirilayotgan chora-tadbirlarni, umuman, davlat tashqi siyosatini to‘liq qo‘llab-quvvatlashini qayd etgan.
Ijtimoiy so‘rov xalqning Prezidentga ishonchi yuqori ekanini ko‘rsatdi. Natijalar tahliliga ko‘ra, aksariyat yurtdoshlar O‘zbekiston Respublikasi Prezidenti Shavkat Mirziyoyev fuqarolarning ishonch va orzu-umidlarini to‘liq oqladi, u el-yurt orasida yuksak hurmat-e’tiborga ega, aholining ko‘pchiligi tomonidan qo‘llab-quvvatlanayotgan davlat rahbari, degan fikrda. Prezidentga ishonch reytingi 2017-yil oktabrdagi 93,1 foizdan 2018-yil mayda 94,1 foizga oshgani buning yorqin tasdig‘idir.
Izoh (0)