BMT Bolalar jamg‘armasi (YUNISЕF) O‘zbekistondagi vakolatxonasi va COSCOM MCHJ o‘rtasida tuzilgan bitimga binoan O‘zbekistonda yoshlarning fikr-mulohazalarini ifodalash uchun mo‘ljallangan resurs — U-Report tizimi yaratiladi. Bu haqda O‘zA xabar berdi.
O‘zbekiston Yoshlar Ittifoqi ham ishtirok etuvchi U-Report loyihasida SMS va boshqa texnologiyalar yordamida abonentlardan ma’lumot va fikrlar yig‘iladi. Turli sektorlardagi vaziyatni yaxshilash uchun so‘rovlar natijalari yoshlar hamda qarorlarni qabul qilishda ishtirok etadigan shaxslar orasida tarqatiladi. Fikrlarni yig‘ish uchun beriladigan savollar sog‘liqni saqlash, ta’lim sohalari, yoshlar orasidagi ishsizlik va yoshlarga tegishli boshqa masalalarni qamrab olishi mumkin.
—Yoshlarning fikrlarini eshitish o‘ta muhim, chunki ular O‘zbekiston aholisining 60 foizidan ortig‘ini tashkil qiladi, — deydi YUNISЕFning O‘zbekistondagi vakolatxonasi rahbari Sasha Graumann. —Bugun O‘zbekistondagi siyosat aynan xalq bilan muloqotni nazarda tutadi. Bizning loyihamiz asosida ham yoshlar va davlat o‘rtasidagi muloqotni yanada kuchaytirish maqsadi yotadi. U-Report o‘z atrofida mavjud muammolar to‘g‘risida ma’lumotlarni taqdim etish uchun reportyorlar vazifasini bajaradigan yosh ko‘ngillilar sa’y-harakatlariga tayanadi, bu esa o‘zgarishlarga xizmat qiladi. UCELL bilan hamkorlikda amalga oshirayotgan ushbu loyihamiz boshqa davlatlarda ham joriy etilgan va yaxshi natijalarga erishilgan.
Bugungi kunda U-Report platformasi 5 million nafardan ortiq respondentlari mavjud bo‘lgan dunyoning 41 mamlakatlarida qo‘llaniladi. Ushbu innovatsion metodologiya alohida axborotlarning sir saqlanishini kafolatlaydi, lekin ayni paytda umumlashtirilgan ma’lumotlar bilan jamoatchilik bemalol tanishish imkoniga ega bo‘ladi.
Olingan axborot yoshi, jinsi va mintaqalar bo‘yicha real vaqt tartibida tahlil etilib, yoshlar uchun muxim masalalarga hukumat e’tiborini jalb qilishga yordam beradi. U-Report platformasida ro‘yxatdan o‘tish ixtiyoriy va bepul asosda amalga oshiriladi.
Izoh (0)