Iroda Qo‘chqorova Namangan viloyati hokimining o‘rinbosari — viloyat xotin-qizlar qo‘mitasi raisi lavozimiga tayinlandi. Bu haqda “Daryo” muxbiri Azizbek Abduvaliyev xabar bermoqda.
U 1967-yilda Namangan viloyatining Pop tumanida tug‘ilgan. Namangan davlat pedagogika institutini (hozirgi Namangan davlat universiteti) tamomlagan. Ish faoliyatini Pop tumanidagi 23-umumta’lim maktabida o‘qituvchilikdan boshlagan.
Keyinchalik viloyat va Mingbuloq tuman yoshlar qo‘mitasi, Xalq demokratik partiyasi tuman kengashi, tuman hokimligida turli vazifalarda mehnat qilgan.
U 2007-yildan beri Mingbuloq tumani hokimining o‘rinbosari — tuman xotin-qizlar qo‘mitasi raisi lavozimida ishlab kelayotgan edi.
Eslatib o‘tamiz, oldinroq Namangan viloyati hokimining o‘rinbosari Zulayho Mahkamova O‘zbekiston Xotin-qizlar qo‘mitasi raisining birinchi o‘rinbosari etib tayinlangani haqida xabar berilgandi.
Izoh (0)