Namanganning Norin tumanida aholi har kuni tongda mahalliy “Shodlik” stadioniga to‘planib, badantarbiya mashqlarini bajarishga o‘rgandi. Bu haqda “Daryo” muxbiri xabar bermoqda.
Har yakshanbada esa tuman hokimi Dilmurod Qodirov boshchiligida yugurish musobaqasi yo‘lga qo‘yildi. 27-may kuni bo‘lib o‘tgan mini-marafonda 1000 dan ortiq kishi ishtirok etdi.
Musobaqa yakunlanganidan so‘ng uning g‘oliblariga mukofotlar topshirildi. Jumladan, eng yosh ishtirokchi — tumandagi 5-umumta’lim maktabining 5-sinf o‘quvchisi Umida Burhonjonova velosiped bilan rag‘batlantirildi.
— Norinda ma’naviy-ma’rifiy tadbirlar, jismoniy tarbiya va sportning ommaviyligiga urg‘u berilayotgani bejiz emas. Davlat rahbarining tumanimizga tashrifidan so‘ng uch yo‘nalish — ichkilikbozlik, ajrimlar va jinoyatchilikni oldini olishga alohida e’tibor qaratishni o‘zimizga maqsad qilib oldik. Bunda esa ruhiy tarbiyadan tashqari jismoniy chiniqishning o‘rni katta ekanligi, sport bilan mashg‘ul kishilar behuda ishlarga chalg‘imasligi barchaga ayon, — deydi Respublika ma’naviy va ma’rifat markazi tuman bo‘linmasi rahbari Rahima Rasulova.
Izoh (0)