Наманганнинг Норин туманида аҳоли ҳар куни тонгда маҳаллий «Шодлик» стадионига тўпланиб, бадантарбия машқларини бажаришга ўрганди. Бу ҳақда «Дарё» мухбири хабар бермоқда.
Ҳар якшанбада эса туман ҳокими Дилмурод Қодиров бошчилигида югуриш мусобақаси йўлга қўйилди. 27 май куни бўлиб ўтган мини-марафонда 1000 дан ортиқ киши иштирок этди.
Мусобақа якунланганидан сўнг унинг ғолибларига мукофотлар топширилди. Жумладан, энг ёш иштирокчи — тумандаги 5-умумтаълим мактабининг 5-синф ўқувчиси Умида Бурҳонжонова велосипед билан рағбатлантирилди.
— Норинда маънавий-маърифий тадбирлар, жисмоний тарбия ва спортнинг оммавийлигига урғу берилаётгани бежиз эмас. Давлат раҳбарининг туманимизга ташрифидан сўнг уч йўналиш — ичкиликбозлик, ажримлар ва жиноятчиликни олдини олишга алоҳида эътибор қаратишни ўзимизга мақсад қилиб олдик. Бунда эса руҳий тарбиядан ташқари жисмоний чиниқишнинг ўрни катта эканлиги, спорт билан машғул кишилар беҳуда ишларга чалғимаслиги барчага аён, — дейди Республика маънавий ва маърифат маркази туман бўлинмаси раҳбари Раҳима Расулова.
Изоҳ (0)